Rydyn ni’n cefnogi ymgyrch genedlaethol i gadw ffyrdd Gwent yn ddiogel
Cynnwys y prif erthygl
Bydd swyddogion o’n huned Plismona Ffyrdd a Gweithrediadau Arbenigol ar grwydr ar ein ffyrdd yn rhan o ymgyrch genedlaethol, yn helpu i gadw ein ffyrdd yn ddiogel.
Yn ystod yr ymgyrch addysgol sy’n dechrau dydd Llun 11 Medi ac yn parhau am bythefnos, bydd ein swyddogion yn helpu i gadw holl ddefnyddwyr y ffyrdd yn ddiogel; gan gynnwys pobl sy’n cael eu hystyried i fod yn ‘agored i niwed'.
Bydd yr ymgyrch yn canolbwyntio ar y defnyddwyr ffyrdd canlynol:
- beicwyr modur
- beicwyr
- marchogwyr
- cerddwyr.
Bydd swyddogion yn ymgysylltu â defnyddwyr ffyrdd hŷn ac iau sy’n cael eu hystyried i fod yn agored i niwed hefyd.
Nod cyffredinol yr ymgyrch yw:
- codi ymwybyddiaeth o’r defnyddwyr ffyrdd hyn a’r hyn sy’n eu gwneud nhw’n agored i niwed
- addysgu gyrwyr
- gorfodi pobl i gydymffurfio â rheoliadau traffig ffyrdd
- lleihau nifer y bobl sy’n cael eu lladd neu eu hanafu’n ddifrifol ar ein ffyrdd
- tynnu sylw at y pwnc.
Dywedodd Rhingyll RPSO Dan Wise, y swyddog sy’n arwain yr ymgyrch yma:
"Ein blaenoriaeth yw cadw pawb sy’n defnyddio’r ffyrdd yn ddiogel.
"Mae’r defnyddwyr ffyrdd y cyfeirir atyn nhw yn rhan o’r ymgyrch yma yn arbennig o agored i gael anaf difrifol os ydyn nhw mewn gwrthdrawiad. Felly rydym wedi ymroi i wneud popeth o fewn ein gallu i godi ymwybyddiaeth o sut gall pob un ohonom ni wella ein diogelwch ar y ffyrdd, a chymryd camau yn erbyn defnyddwyr ffyrdd sy’n rhoi’r bobl yma mewn mwy o berygl.
“Bydd ein swyddogion ar grwydr ledled Gwent trwy gydol yr ymgyrch yma, yn stopio pobl sy’n peryglu pobl eraill ac yn esbonio iddyn nhw sut gallan nhw helpu i gadw pobl sy’n fwy agored i niwed ar ein ffyrdd yn ddiogel.
“Byddwn yn ceisio ymgysylltu â chymaint o ddefnyddwyr y ffyrdd â phosibl yn ystod y cyfnod yma i godi ymwybyddiaeth ac i helpu i atal mwy o bobl rhag cael eu lladd neu eu hanafu’n ddifrifol ar ein ffyrdd.”
Ar ffyrdd Cymru yn 2022:
- lladdwyd 19 o gerddwyr
- lladdwyd 21 o feicwyr modur
- lladdwyd 7 o feicwyr.
Rhwng 2016 a 2022, lladdwyd 1 o farchogwyr.
Cadwch lygad ar ein sianeli cyfryngau cymdeithasol i weld beth fydd ein swyddogion yn ei wneud dros y pythefnos nesaf.
Os gwelwch chi rywun yn gyrru’n beryglus, ffoniwch 101 neu riportiwch drwy gyfrwng ein sianeli cyfryngau cymdeithasol.
Mewn argyfwng, ffoniwch 999 bob tro.