Arolygydd yn cyhoeddi cyngor diogelwch ar gyfer cerbydau yn dilyn nifer o achosion o ddwyn

Mae swyddogion Gwent yn cynghori perchnogion cerbydau - yn enwedig pobl sy'n berchen ar geir sydd â systemau mynediad di-allwedd - i fod yn wyliadwrus yn dilyn nifer o achosion o ddwyn yn Nhorfaen yn ddiweddar.

Rhwng 5 Awst ac 8 Awst, derbyniodd Heddlu Gwent bum adroddiad o ddwyn, gyda Ford Fiesta STs ac Eco Sports, ac Range Rover Evoques ymhlith y cerbydau a gafodd eu dwyn.

Dywedodd yr Arolygydd Lee Stachow, arweinydd plismona cymdogaeth Torfaen:

Gall lladron manteisgar ddefnyddio meddalwedd i godi'r signal sy'n cael ei allyrru gan systemau mynediad di-allwedd a chael mynediad i'r car heb fod â'r allwedd.

"Mae modd gwneud hyn yn gyflym - weithiau o fewn ychydig funudau - ac mae modd ei wneud y tu allan i'n tai, felly mae'n bwysig ein bod ni i gyd yn cymryd rhai camau ataliol i amddiffyn ein cerbydau.

Y cam cyntaf yw cadw eich ffob allwedd i ffwrdd o ddrysau a ffenestri, yn ddelfrydol mewn cwdyn blocio signal neu fag faraday, i atal lladron rhag 'cydio' yn y signal o'r tu allan.

"Gallwch hefyd ddiffodd signal diwifr y ffob pan nad yw'n cael ei ddefnyddio, cysylltwch â'ch deliwr car i wirio bod meddalwedd eich cerbyd yn gyfredol a defnyddio clo ar yr olwyn lywio i ychwanegu'r haen ychwanegol honno o ddiogelwch."

Cadw eich car yn ddiogel | Rhai awgrymiadau i atal troseddu

• Mae clo mecanyddol ar y llyw, postiau ar y dreif, clampiau olwyn a thracwyr yn ffyrdd effeithiol o amddiffyn cerbydau ac atal lladron.
• Parcio cerbydau mewn garej neu ar y dreif.
• Parcio mewn ardaloedd sydd wedi'u goleuo'n dda ac osgoi ardaloedd sy'n dywyll neu wedi'u cuddio o olwg y cyhoedd.
• Peidio byth â gadael unrhyw eitemau personol i'w gweld y tu mewn i'r cerbyd.
• Gwneud yn siŵr eich bod yn cadw'r tu mewn i'ch cerbyd yn glir o annibendod, a chuddio eitemau trydanol fel sat nav a ffonau symudol.
• Sicrhau bob amser fod cerbydau heb eu goruchwylio yn cael eu cloi.
• Ysgythru ffenest eich car. Mae ysgythru saith digid olaf eich rhif adnabod cerbyd (neu’r rhif cofrestru) ar y ffenestri, goleuadau a drychau yn golygu y bydd yn anodd iawn i unrhyw un sy'n ceisio newid y modd o adnabod eich cerbyd.
• Bod yn wyliadwrus a riportio ymddygiad amheus.

Allwch chi helpu?

Gall unrhyw un sydd â gwybodaeth am y lladradau diweddar ein ffonio ar 101 neu anfon neges uniongyrchol atom trwy Facebook neu X.

Gallwch hefyd roi gwybod i Crimestoppers yn ddienw ar 0800 555 111.