Apêl o’r newydd am wybodaeth i ddod o hyd i ddyn o Drecelyn a aeth ar goll union 12 mlynedd yn ôl

Rydyn ni’n parhau i apelio am wybodaeth i ganfod beth ddigwyddodd i Kyle Vaughan, 12 mlynedd ar ôl iddo gael ei weld ddiwethaf.

Y tro diwethaf i’r dyn o Drecelyn, a oedd yn 24 oed ar y pryd, gael ei weld oedd tua 11.45pm ar 30 Rhagfyr 2012.

Roedd y car yr oedd yn ei yrru, Peugeot 306 arian, mewn gwrthdrawiad un cerbyd ar yr A467 rhwng Crosskeys a Rhisga ar 30 Rhagfyr 2012.

Lansiwyd ymchwiliad person coll i ddechrau a ddaeth wedyn yn ymchwiliad llofruddiaeth, ar ôl i wyth o bobl gael eu harestio mewn cysylltiad â’i ddiflaniad; cafodd pob un ohonyn nhw eu rhyddhau heb eu cyhuddo.

Meddai Ditectif Brif Arolygydd Andrew Tuck, yr uwch swyddog ymchwilio:

 

"Byddai Kyle yn 36 oed yn awr ac mae ein ditectifs yn parhau i weithio ar yr achos, ac yn dilyn unrhyw lwybrau ymchwilio sy’n dod i’r amlwg.

"Mae ei deulu wedi byw heb atebion i’w cwestiynau am gymaint o amser ac rydyn ni mewn cysylltiad rheolaidd â nhw wrth i ni barhau i geisio darganfod beth ddigwyddodd iddo.

"Gofynnaf yn daer ar aelodau’r cyhoedd i gysylltu â ni gydag unrhyw wybodaeth sydd gennych chi, ni waeth pa mor ddibwys rydych chi’n credu yw’r wybodaeth honno."

Os oes gennych unrhyw wybodaeth yn ymwneud â diflaniad Kyle, gallwch ein ffonio ni ar 101 neu anfon neges uniongyrchol ar y cyfryngau cymdeithasol, ar-lein ar www.gwent.police.uk neu drwy anfon e-bost at [email protected], gan grybwyll rhif cofnod 397 30/12/12.

Gallwch gyflwyno gwybodaeth mewn cysylltiad â’n hymchwiliad i ddiflaniad Kyle ar borth digwyddiadau mawr yr heddlu (MIPP) hefyd, sydd ar gael yma.

Gallwch gysylltu â Crimestoppers yn ddienw gyda manylion hefyd ar 0800 555 111 neu ar www.crimestoppers.org.uk.