Helpwch ni i wasgu’n dynn ar bobl sy’n dwyn o siopau’r Nadolig yma

Byddwn yn cymryd camau cadarn yn erbyn pobl sy’n cyflawni troseddau dwyn o siopau a throseddau manwerthu yn ein cymunedau.

Fel heddlu, rydyn ni’n cydnabod bod dwyn o siopau a throseddau manwerthu yn gallu cael effaith ar ein cymunedau - ar unigolion a busnesau.

Nid yw dwyn, ac yn arbennig dwyn o siopau’n drosedd heb ddioddefwyr a byddwn yn gweithio gyda busnesau trwy gydol cyfnod y Nadolig i greu llefydd diogel i siopa, a lleihau trosedd ac ymddygiad gwrthgymdeithasol.

Mae’n hollbwysig bod pob achos o ddwyn o siopau’n cael ei riportio wrthym ni, er mwyn i ni weithredu.

Yn nwyrain yr ardal heddlu, sy’n cynnwys Casnewydd, rydyn ni wedi gweld lleihad o un mis i’r llall yn nifer y troseddau dwyn o siopau a gofnodwyd ym misoedd Awst, Medi a Hydref.

Bydd ein timau plismona cymdogaeth yn cynnal patrolau amlwg, yn arbennig yng nghanol trefi a pharciau manwerthu sydd fel arfer yn profi’r cynnydd mwyaf mewn troseddau manwerthu dros gyfnod yr Ŵyl.

Byddwn yn dal i roi cyngor atal trosedd defnyddiol i fusnesau ac yn targedu troseddwyr mynych a phenderfynol y mae eu hymddygiad yn achosi gofid ac yn effeithio ar ein manwerthwyr a’n cymunedau.

Meddai Uwch-arolygydd Jason White:

“Byddwn yn parhau i gymryd camau cadarn yn erbyn pobl sy’n cyflawni troseddau dwyn o siopau a throseddau manwerthu yn ein cymunedau.

"Byddwn yn gweithio’n agos gyda’n partneriaid a busnesau i atal ac ymchwilio i droseddau dwyn o siopau.

“Mae cydweithredu’n allweddol wrth fynd i’r afael â dwyn o siopau ac mae ein ffigyrau diweddaraf y flwyddyn ariannol yma’n dangos ein bod yn cymryd mwy o gamau gweithredu yn erbyn mwy o bobl syn dwyn o siopau.

“Byddwn yn defnyddio tactegau cudd i dargedu troseddwyr ac yn defnyddio lluniau TCCC gan fusnesau a thechnoleg adnabod wynebau i gynorthwyo ein gwaith i adnabod pobl sy’n cyflawni troseddau manwerthu.”

Yng Ngwent, cofnodwyd 3,164 o droseddau dwyn o siopau hyd yn hyn yn y flwyddyn ariannol yma.

Fel heddlu, mae ein canlyniadau cadarnhaol o ran troseddau dwyn o siopau, sy’n cynnwys arestiadau, hysbysiadau a rhybuddion ymddygiad troseddol, wedi cynyddu 179 yn ystod y cyfnod yma.

Mae ein swyddogion yn cynnal nifer o stondinau cyngor atal trosedd trwy fis Rhagfyr, gan gynnwys:

Canolfan siopa Cwmbrân dydd Mawrth 3 Rhagfyr rhwng 10am a 2pm,
Canol y dref Caerffili dydd Gwener 6 Rhagfyr,
Campws Brynbuga Coleg Gwent dydd Iau 12 Rhagfyr rhwng 12pm a 3pm.

Meddai Uwch-arolygydd White:

“Rwyf eisiau annog pawb sy’n gweithio yn y sector manwerthu i barhau i riportio gweithgarwch troseddol. Mae’n bwysig eich bod chi’n riportio pob digwyddiad o ddwyn wrthym ni er mwyn i ni ymchwilio.

“Rwyf eisiau sicrhau busnesau a siopwyr ein bod ni’n gwrando ar eich pryderon.

“Er bod y ffigyrau ar gyfer dwyn o siopau yn ein hardal heddlu wedi cynyddu eleni, yn debyg i’r duedd ar draws y wlad, rydym wedi ymroi i wneud yn siŵr bod Gwent yn parhau i fod ymysg y llefydd mwyaf diogel i fyw a gweithio ynddynt yng Nghymru.”

I weld ein hawgrymiadau ar gyfer atal trosedd, ewch i: https://www.gwent.police.uk/cy-GB/cp/cyngor-atal-troseddau/dwyn-o-siopau/

erol, riportiwch wrthym ni drwy:
ffonio 101
anfon neges atom ni ar gyfryngau cymdeithasol
riportio ar-lein: https://www.gwent.police.uk/cy-GB/riportio/riportio/.
Ffoniwch 999 bob tro mewn argyfwng.