Pedwar o bobl wedi’u cyhuddo o ymgais i lofruddio ar ôl ymosodiad Casnewydd

Rydyn ni wedi cyhuddo pedwar o bobl o ymgais i lofruddio yn dilyn adroddiad am ymosodiad ar Nash Road, Casnewydd, dydd Iau 7 Tachwedd.

Arestiwyd dau fachgen 16 oed a dau fachgen 17 oed ar amheuaeth o ymosodiad adran 18 ond cawsant eu cyhuddo’n ddiweddarach o ymgais i lofruddio.

Mae’r pedwar ohonynt wedi ymddangos gerbron Llys Ynadon Casnewydd a chafodd y pedwar ohonynt eu remandio i’r ddalfa.

Aethpwyd â dyn 18 oed i’r ysbyty i gael triniaeth a chafodd ei ryddhau yn ddiweddarach.

Meddai Uwch-arolygydd Jason White:

“Yn dilyn y penderfyniadau i arestio a chyhuddo mewn cysylltiad â’r drosedd yma, hoffwn atgoffa pobl o’u cyfrifoldebau i osgoi effeithio ar yr ymchwiliad gweithredol yma.

“Mae’n hollbwysig bod pobl yn ystyried y dôn a’r iaith a ddefnyddir mewn sylwadau sy’n cael eu postio ar-lein yn sôn am unrhyw berson dan amheuaeth o gyflawni trosedd.

“Gallai’r sylwadau yma effeithio ar ein gallu i ddwyn unrhyw un sydd wedi cael ei ganfod i fod wedi cyflawni trosedd gerbron y llysoedd, ond gallai hefyd arwain at ymchwiliad i droseddau eraill sydd â’r bwriad o rwystro’r broses gyfreithiol.”

Gofynnir i unrhyw un â gwybodaeth am yr ymosodiad gysylltu â ni ar ein gwefan, ein ffonio ni ar 101, neu anfon neges uniongyrchol atom ni ar gyfryngau cymdeithasol, gan grybwyll rhif cofnod 2400371556.

Fel arall, gallwch gysylltu â Crimestoppers yn ddienw gyda manylion ar 0800 555 111.