Swyddogion Gwent yn parhau i frwydro yn erbyn troseddau cyllyll a thrais difrifol

Swyddogion Gwent yn parhau i frwydro yn erbyn troseddau cyllyll a thrais difrifol.

Mae Heddlu Gwent yn ymuno â gwasanaethau ledled y wlad i wneud saith diwrnod o waith troseddau gwrth-gyllyll yn rhan o Sceptre, yr wythnos ymwybyddiaeth genedlaethol.

Bydd swyddogion ar draws ein timau plismona cymdogaeth ac unedau troseddau difrifol a chyfundrefnol yn dod at ei gilydd i gynnal gwarantau, chwiliadau a gwneud gwaith ymchwilio.

Bydd y timau hefyd yn parhau i rannu cyngor atal troseddau mewn ysgolion a'r gymuned ehangach i dynnu sylw at yr effaith y gall troseddau cyllyll ei chael ar ein cymdogaethau.

Mae troseddau cyllyll yng Ngwent wedi gostwng 2.3% yn y 12 mis hyd at fis Medi 2024, ac mae 11 yn llai o droseddau 'wedi'u galluogi gan gyllyll' nag yn y 12 mis hyd at fis Medi 2023.

Er gwaethaf hyn, rydym yn dal i weld digwyddiadau trasig yn ymwneud â chyllyll sy'n cael effaith ddinistriol ar deuluoedd a ffrindiau.

Yn ddiweddarach y mis hwn, mae disgwyl i David Sisman gael ei ddedfrydu ar ôl iddo gael ei ganfod yn euog o lofruddiaeth Lee Crewe, 36 oed, yng Nghasnewydd yn gynharach eleni.

Clywodd y llys fod Mr Crewe wedi marw o ganlyniad i un clwyf wedi iddo gael ei drywanu yn ei frest.

Mae swyddogion yn parhau i weithio'n ddiflino i leihau'r risg o ddigwyddiadau tebyg ac i ddiogelu cymunedau rhag trais difrifol.

Dywedodd y Rhingyll Phill Jones, sy'n arwain ymgyrch Sceptre Gwent:

"Er bod cymryd cyllyll ac arestio yn rhan bwysig o'n dull gweithredu, mae ymyriadau eraill yn cynnwys gwaith addysgol mewn ysgolion, amnestau cyllyll a delio â hygyrchedd arfau trwy weithio gyda manwerthwyr a mwy.

"Rydym hefyd yn parhau i weithio gyda manwerthwyr i gadw cyllyll allan o'r dwylo anghywir. Mae hyn yn cynnwys ymgyrchoedd profion prynu a menter gwerthwyr cyfrifol, lle rydym yn gweithio gydag awdurdodau lleol a manwerthwyr lleol i sicrhau bod eitemau â llafn yn cael eu gwerthu'n gyfreithiol ac yn gyfrifol.

"Does dim esgusodion. Nid yw cario cyllell yn eich amddiffyn chi. Gallant ddinistrio bywydau, a dyna pam mae’n bwysig hefyd ein bod yn parhau i siarad â phobl ifanc i'w haddysgu am ganlyniadau cario eitemau â llafn.

"Fel bob amser, mae gan y cyhoedd ran hanfodol wrth helpu i gadw cyllyll oddi ar ein strydoedd. Gallwch fod yn llygaid ac yn glustiau i ni yn ein brwydr yn erbyn trais difrifol a throseddau cyllyll, a thrwy roi gwybod i ni, fe allech helpu i achub bywyd."

DIWEDD

Nodiadau i olygyddion

Amseroedd agor bin Amnest

Mae biniau amnest cyllyll wedi'u gosod mewn pum gorsaf heddlu yng Ngwent, gan ganiatáu i bobl waredu cyllyll a llafnau peryglus yn ddiogel, ac yn ddienw.

Bydd y biniau yn y gorsafoedd canlynol ac yn hygyrch yn ystod yr amseroedd hyn:

• Canol Casnewydd: 8am - 6pm
• Trefynwy: 9am - 1pm a 2pm – 4pm
• Y Coed Duon: 9am - 1pm a 2pm – 4pm
• Glyn Ebwy: 9am - 1pm a 2pm – 4pm
• Cwm-brân: 9am - 1pm a 2pm – 4pm
• Bedwas: gall pobl sy'n ymweld â gorsaf yr heddlu ddefnyddio'r gloch wrth y drws ffrynt. Yna bydd swyddogion yn cwrdd ag ymwelwyr ac yn gwaredu'r gyllell yn y bin amnest

Gofynnir i bobl sy'n dymuno gadael cyllyll yn y biniau ildio hyn eu storio'n ddiogel wrth eu cludo ac yna pecynnu'r llafnau cyn eu rhoi yn y biniau fel y gellir eu symud yn ddiogel.