High-visibility patrols to reduce anti-social behaviour in Monmouthshire town

Mae ein swyddogion yn gweithio mewn partneriaeth gyda Chyngor Sir Fynwy'r wythnos yma i gadw pobl yn ddiogel yng nghanol tref Cil-y-coed.

Wrth i Galan Gaeaf agosáu, rydyn ni’n annog pobl i feddwl am bobl eraill a pharchu eu dymuniadau.

Er ein bod ni eisiau i bawb fwynhau eu hunain yn ddiogel ac yn gyfrifol, byddwn yn cymryd camau yn erbyn y rheini sy’n benderfynol o ymddwyn yn wrthgymdeithasol.

Ar y cyd â’n partneriaid yng Nghyngor Sir Fynwy, rydyn ni’n gweithio i helpu i gadw preswylwyr Cil-y-coed yn ddiogel rhag niwed.

Yn rhan o Ymgyrch Lumley, ymgyrch sy’n cael ei hariannu gan y llywodraeth, mae ein swyddogion wedi bod yn cynnal patrolau amlwg – a byddant yn parhau i wneud hynny yn yr ardaloedd o gwmpas canol tref Cil-y-coed sydd wedi cael eu nodi fel mannau lle mae ymddygiad gwrthgymdeithasol yn broblem.

Bydd mwy o bresenoldeb heddlu gyda’r nos yng Nghil-y-coed dydd Mercher (30 Hydref), dydd Iau (31 Hydref), dydd Gwener (1 Tachwedd), dydd Sadwrn (2 Tachwedd) dydd Sul (3 Tachwedd), dydd Llun (4 Tachwedd) a dydd Mawrth (5 Tachwedd).

“Fel arfer mae hwn yn un o gyfnodau prysuraf y flwyddyn i ni, pan mae adroddiadau am ymddygiad gwrthgymdeithasol yn tueddu i gynyddu,” meddai Arolygydd Atal Trosedd Christine James.

“Mae gan bawb yr hawl i deimlo’n ddiogel yn eu cymunedau a dim ond trwy weithio gyda’n gilydd fel partneriaid y gallwn ni adeiladu cymunedau mwy diogel.

“Er y bydd y mwyafrif helaeth y bobl yng Nghil-y-coed yn ymddwyn yn gyfrifol; byddwn yn parhau i roi sylw i unrhyw broblemau fel trosedd a diogelwch y cyhoedd.”

Yn rhan o’r gronfa Strydoedd Saffach, bydd Cyngor Sir Fynwy yn rhoi mesurau ychwanegol ar waith i gadw pobl yn ddiogel yng Nghil-y-coed.

Bydd staff diogelwch preifat achrededig yn gweithio mewn parau ar batrôl yn yr ardal o gwmpas y Stryd Fawr nos Fercher (30 Hydref) a nos Iau (31 Hydref).

Bydd aelodau ychwanegol o’r Tîm Gwasanaethau Ieuenctid yn rhoi cymorth gydag oriau agor estynedig yng Nghanolfan Ieuenctid Zone, a byddant yn gwisgo tabardau hawdd eu hadnabod.

I gefnogi’r gwaith rhagweithiol yma i leihau ymddygiad gwrthgymdeithasol, bydd staff ychwanegol o’r Gwasanaeth Adnoddau a Rennir (SRS) yn gweithio yn yr ystafell reoli teledu camerâu cylch cyfyng (TCCC) i fonitro camerâu diogelwch yr ardal.

Meddai’r Cynghorydd Angela Sandles, Aelod Cabinet dros Gydraddoldeb ac Ymgysylltu Cyngor Sir Fynwy: “Ar y cyd gyda Heddlu Gwent, rydyn ni wedi nodi ardaloedd yng Nghil-y-coed lle mae ymddygiad gwrthgymdeithasol yn achosi pryder i breswylwyr.

“Bydd ein staff yn gweithio mewn partneriaeth gyda’r heddlu trwy gydol yr wythnos yma i sicrhau bod canol tref Cil-y-coed yn parhau i fod yn lle croesawgar a diogel i bawb.”

Os ydych chi’n pryderu am drosedd neu ymddygiad gwrthgymdeithasol yn eich ardal, cysylltwch â ni ar ein gwefan, ar ein cyfrifon cyfryngau cymdeithasol, neu drwy ffonio 101. Ffoniwch 999 bob tro mewn argyfwng.