Yr Uned Cerbydau Masnachol yn cefnogi ymgyrch genedlaethol
Cynnwys y prif erthygl
Cynhaliodd swyddogion o’r Uned Cerbydau Masnachol wythnos o weithgareddau ymgysylltu ac wythnos o orfodi rheolau er mwyn cadw ffyrdd Gwent yn ddiogel.
Roedd mis Ionawr yn Fis Cerbydau Masnachol - ymgyrch genedlaethol sy’n rhan o galendr plismona ffyrdd Cyngor Cenedlaethol Penaethiaid yr Heddlu.
Mae ein Huned Cerbydau Masnachol (yr Uned) yn cynnwys swyddogion plismona ffyrdd sydd wedi cael hyfforddiant ychwanegol sy’n eu galluogi nhw i orfodi rheolau sy’n berthnasol i gerbydau masnachol – gallant fod yn unrhyw beth o fan sgrap yn cario gormod o lwyth i gerbydau mawr sy’n cludo deunydd ymbelydrol.
Yn rhan o elfen ymgysylltu Mis Cerbydau Masnachol, aeth y tîm i ymweld â nifer o gwmnïau a sefydliadau mawr a oedd yn peri problemau er mwyn eu dysgu nhw a’u helpu nhw i newid arferion gweithio ar draws eu fflyd gyfan.
Yn sgil y gwaith yma, gofynnwyd i’r tîm siarad yn Stadiwm Principality o flaen y Gymdeithas Frenhinol er Atal Damweiniau (ROSPA) yn ystod yr wythnosau i ddod.
At ddibenion gorfodi, yn ogystal â’u gwaith o ddydd i ddydd, cynhaliodd yr Uned dri ymgyrch ar y ffyrdd:
- Ymgyrch Chelsea - ymgyrch ar raddfa fach yn targedu gyrwyr cerbydau nwyddau trwm dan ddylanwad cyffuriau - stopiwyd 12 cerbyd ac arestiwyd dau yrrwr am brofi’n bositif mewn prawf cyffuriau
- Ymgyrch Reform - ymgyrch ar raddfa fawr a gynhaliwyd yn y Coldra ochr yn ochr â phartneriaid DVSA yn targedu pob agwedd ar droseddwyr cerbydau masnachol - ymdriniwyd â 27 trosedd, ac roedd pump ohonynt mor beryglus cawsant eu gwahardd rhag cael eu defnyddio ar y ffyrdd
- Ymgyrch Tramline - cefnogwyd yr ymgyrch gan National Highways a roddodd fenthyg uned tractor HGV plaen i’r tîm er mwyn iddyn nhw allu gweld cerbydau’n cyflawni troseddau ar y rhwydwaith ffyrdd strategol - ymdriniwyd â 28 trosedd 4 Marwol, yn ogystal â thair trosedd Adeiladu a Defnydd
- Y 4 Marwol yw defnyddio ffôn symudol wrth yrru, peidio â gwisgo gwregys diogelwch, yfed dan ddylanwad alcohol/cyffuriau, a goryrru.
Mae gyrru’n anghyfrifol neu gyda llwyth anniogel, cyflawni un o’r 4 Marwol, neu beidio â chadw eich cerbyd mewn cyflwr da yn annerbyniol, ac mae ymgyrchoedd pwrpasol fel yr un yma’n sicrhau bod pobl sy’n diystyru’r gyfraith yn cael eu trin yn unol â hynny.
Os ydych chi’n pryderu am gerbydau nad ydynt yn addas ar gyfer y ffyrdd, cerbydau’n cael eu gyrru’n anghyfreithlon, neu rywun yn gyrru dan ddylanwad, gallwch riportio ar ein gwefan, drwy ffonio 101, neu drwy anfon neges atom ni ar Facebook neu X.
Ffoniwch 999 bob tro mewn argyfwng.