Mae swyddogion yn gwybod pwy oedd y ddau fachgen a oedd yn rhan o anhrefn yng nghanol dinas Casnewydd
Cynnwys y prif erthygl
Bydd swyddogion yn parhau i gynnal patrolau rheolaidd i fynd i’r afael ag ymddygiad gwrthgymdeithasol yng nghanol dinas Casnewydd.
Ymatebodd swyddogion i adroddiad am anhrefn yn ardal Kingsway, Casnewydd, tua 8pm ddydd Llun 3 Chwefror a oedd yn ymwneud â dau berson ac a welwyd gan grŵp mawr o bobl.
Aethom i’r safle a rhoi gorchymyn gwasgaru ar waith dros nos ar gyfer yr ardal leol, i atal unrhyw ymddygiad gwrthgymdeithasol pellach.
Meddai Cwnstabl Heddlu Connie Brown, o Heddlu Gwent:
“Rydyn ni’n gweithio’n agos gyda’n partneriaid ac asiantaethau i fonitro a lleihau ymddygiad gwrthgymdeithasol yng nghanol dinas Casnewydd.
"Ar ôl edrych dros luniau TCCC a gwneud ymholiadau, rydyn ni’n gwybod pwy yw’r ddau fachgen yn eu harddegau a oedd yn rhan o’r anhrefn yn gynharach yr wythnos yma. Rydyn ni wedi cysylltu â nhw ac mae camau gweithredu’n cael eu cymryd.
"Byddwn yn parhau i gynnal patrolau rheolaidd yn yr ardal ac i weithio gyda’n partneriaid i wneud popeth y gallwn ni i fynd i’r afael ag ymddygiad gwrthgymdeithasol yng nghanol y ddinas.
"Mae mynd i’r afael ag ymddygiad gwrthgymdeithasol yn gofyn am fwy na phlismona yn unig.
“Hoffwn ofyn i rieni, gwarcheidwaid a gofalwyr siarad â phobl ifanc yng Nghasnewydd a’u helpu nhw i ddeall bod ymddygiad gwrthgymdeithasol nid yn unig yn cael effaith negyddol ar y bobl o’u cwmpas nhw, ond y gallai troseddau maen nhw’n eu cyflawni gael effaith negyddol ar eu bywydau nhw hefyd yn y dyfodol.
Rhowch wybod i ni am eich pryderon drwy ffonio 101, anfon neges atom ar ein sianelau cyfryngau cymdeithasol Facebook neu X, neu ar ein gwefan.
Ffoniwch 999 bob tro mewn argyfwng.