Dau feic cwad wedi’u hatafaelu wrth i swyddogion barhau i weithio i atal gyrru oddi ar y ffordd anghyfreithlon
Cynnwys y prif erthygl
Mae swyddogion cymdogaeth ym Margod wedi atafaelu dau feic cwad ar ôl adroddiadau am yrru gwrthgymdeithasol ar Gomin Gelligaer.
Derbyniodd swyddogion alwad gan aelod o’r cyhoedd yn dweud bod dau feic cwad coch yn rasio dros y comin ac yn “rhwygo llethrau’r mynydd."
Cyn gorffen yr alwad dywedodd y galwr bod y gyrwyr yn gadael yr ardal i gyfeiriad Bargod.
Anfonwyd swyddogion cymdogaeth a swyddogion troseddau cefn gwlad allan. Gwnaethant ddal y beiciau ger Heol Coedcae ym Margod ac atafaelu’r cerbydau oddi ar y ffordd a chyflwyno adroddiadau trosedd traffig (TOR) i’r gyrwyr.
Meddai Rhingyll Tom Brookes:
"Mae dau feic cwad wedi cael eu hatafaelu ar ôl adroddiadau am ddifrodi tir yng Ngelligaer.
"Mae ein tîm wedi ymroi i fynd i’r afael â gyrru oddi ar y ffordd anghyfreithlon, sy’n achosi difrod sylweddol i’r amgylchedd ac yn gallu bod yn niwsans i anifeiliaid a pherchnogion tir. Mae’n gallu rhoi modurwyr a cherddwyr mewn perygl hefyd.
"Mae’r atafaeliadau yma’n dangos pwysigrwydd riportio. Trwy gael disgrifiadau o’r cerbydau a’r gyrwyr, a chael gwybod i ba gyfeiriad roedden nhw’n teithio, rydyn ni wedi gallu gweithredu’n gyflym.
"Yn rhan o batrolau “Parchu Rhymni” y tîm, rydym wedi gosod 10 arwydd newydd yn ddiweddar gyda’r nod o gasglu mwy o wybodaeth am y bobl sy’n difrodi tir lleol trwy yrru cerbydau oddi ar y ffordd yn anghyfreithlon."
Mae’r arwyddion, sy’n dangos cod QR sy’n cyfeirio pobl sy’n riportio at ffurflen hawdd ei defnyddio ar y wefan, yn galluogi’r cyhoedd i roi manylion i ni am yrwyr a’u cerbydau.
Ychwanegodd Rhingyll Brookes:
"Yn ddiweddar rydyn ni wedi gweld achosion o fandaliaeth ddifeddwl yn Rhymni yn ymwneud â cherbydau oddi ar y ffordd, lle mae’r tir wedi cael ei rwygo a safleoedd bws wedi cael eu gorchuddio gan fwd.
"Rwyf eisiau annog unrhyw un sy’n dyst i’r ymddygiad anystyriol a hunanol yma i riportio’r mater wrthym ni, a gallant fod yn sicr y bydd ein tîm yn gwneud popeth o fewn ein gallu i ddod o hyd i’r bobl sy’n gyfrifol, atafaelu eu cerbydau, a’u dwyn nhw i gyfrif."
I gael rhagor o wybodaeth am ymgyrch “Parchu Rhymni” y tîm, ewch i: https://www.gwent.police.uk/police-forces/gwent-police/areas/campaigns/campaigns/2024/respect-rhymney/