Dau o bobl dan amheuaeth yn y ddalfa ar ôl i swyddogion ddod o hyd i gyffuriau mewn cyfeiriad yng Nghwmbrân

Mae swyddogion cymdogaeth yng Nghwmbrân wedi arestio dau o bobl ar amheuaeth o gyflenwi cocên.

Gweithredodd y tîm warantau mewn dau gyfeiriad yn ystod oriau mân y bore yma (dydd Mercher 5 Chwefror), ac arestio’r bobl yno a chwilio’r cyfeiriadau.

Yn ystod y gwarantau, daeth swyddogion o hyd i gyffuriau dosbarth A (credir mai cocên oedden nhw), arian, a nifer o ddyfeisiau symudol. Atafaelwyd y rhain.

Arestiwyd dyn 65 oed o Gwmbrân ar amheuaeth o ymwneud â chyflenwi cyffuriau dosbarth A, ac arestiwyd menyw 40 oed o Fairwater, Cwmbrân, ar amheuaeth o fod â chyffuriau dosbarth A yn ei meddiant gyda’r bwriad o gyflenwi.

Maen nhw yn y ddalfa ar hyn o bryd.

Meddai Cwnstabl Heddlu Joseph O'Connor, swyddog yn yr achos:

"O ganlyniad i warantau'r bore yma rydym wedi llwyddo i ddiogelu cymunedau, tynnu cyffuriau dosbarth A oddi ar y strydoedd a chadw dau unigolyn rydyn ni’n amau sydd wedi bod yn cyflenwi cyffuriau anghyfreithlon yng Nghwmbrân yn y ddalfa.

"Mae’r ymgyrchoedd yma’n bosibl diolch i’r rhan hanfodol mae ein cymunedau’n ei chwarae yn rhoi gwybodaeth i ni, ac yn dweud wrthym ni am eu pryderon am droseddau cyffuriau.

"Mae’r wybodaeth yma, ni waeth pa mor fawr neu fach, yn ein helpu ni i greu darlun o gudd-wybodaeth a chynllunio ymgyrchoedd rhagweithiol i ddwyn troseddwyr o flaen eu gwell."

Os oes gennych chi unrhyw bryderon neu wybodaeth am gyflenwi neu ddelio cyffuriau anghyfreithlon yn eich cymuned, riportiwch y mater ar y wefan, drwy ffonio 101, neu drwy anfon neges uniongyrchol atom ni ar y cyfryngau cymdeithasol, er mwyn i ni weithredu.

Fel arall, gallwch gysylltu â Crimestoppers yn ddienw ar 0800 555 111 gyda gwybodaeth, neu ewch i’w gwefan.