Carcharu troseddwr rhyw ar ôl ymosodiad ar ferch yn ei harddegau

Mae Dean Williams, 29 oed, o Abercynon wedi ei garcharu am bron i bum mlynedd ar ôl ei gael yn euog o ymosod yn rhywiol ar ferch ifanc.

Yn Llys y Goron Caerdydd ddydd Gwener 24 Ionawr dedfrydwyd Williams i bedair blynedd ac wyth mis am weithgaredd rhywiol gyda phlentyn a 22 mis am greu delwedd anweddus o blentyn, a bydd y ddwy ddedfryd yn cydredeg.

Digwyddodd yr ymosodiad mewn parc yng Nghaerffili ym mis Awst 2022 ar ôl i Williams, a oedd yn 26 oed ar y pryd, ychwanegu'r dioddefwr, a oedd yn 13 oed ar y pryd, ar Snapchat.

Dywedodd y Ditectif Ringyll Dros Dro Michael Coles, y swyddog yn yr achos:

"Hoffwn i ddiolch i'r dioddefwr yn yr achos hwn am ddod i roi gwybod i’r heddlu am hyn. Mae hi wedi dangos dewrder a nerth aruthrol drwy gydol yr ymchwiliad a phroses y llys.

"Trwy roi gwybod am hyn, mae hi wedi helpu i roi dyn creulon a pheryglus yn y carchar. Gwnaeth Dean Williams dargedu merch a oedd yn ifanc ac felly’n agored i niwed, ar gyfer ei foddhad rhywiol ei hun ac rydym yn croesawu'r ddedfryd sydd wedi ei orfodi arno.

"Rwy'n gobeithio hefyd y bydd y canlyniad hwn yn dangos i eraill sy’n dioddef trais rhywiol a throseddau rhywiol y bydd rhywun yn gwrando arnynt, ac yn eu credu a'u parchu."

Mae amrywiaeth eang o gymorth ar gael; nid yn unig gan Heddlu Gwent ond gan asiantaethau partner sy'n gallu helpu dioddefwyr a goroeswyr ymosodiad rhywiol drwy'r broses gyfan.

Mae mwy o wybodath ar gael ar wefan Heddlu Gwent: https://www.gwent.police.uk/cy-GB/riportio/riportio/riportiwch/alpha-v1/cyngor/treisio-ymosod-rhywiol-a-throseddau-rhywiol-eraill/cymorth-treisio-ymosodiadau-rhywiol

Cafodd Dean Williams ddedfryd o bedair blynedd ac wyth mis a bydd yn aros ar y gofrestr troseddwyr rhyw am gyfnod amhenodol.