Ymosodiad ci yn arwain at ddedfryd o dair blynedd yn y carchar i’r perchennog

Mae dyn o Lynebwy, y gwnaeth ei gi ymosod yn ffyrnig ar ferch 12 oed yn Nant-y-glo gan achosi anafiadau a oedd angen triniaeth yn yr ysbyty, wedi cael dedfryd o dair blynedd yn y carchar.  

Ymddangosodd Justin Allison, 38, gerbron Llys y Goron Casnewydd ddydd Mercher 29 Ionawr ar ôl pledio’n euog yn flaenorol i fod â chi o frid wedi’i wahardd heb drwydded yn ei feddiant, a bod yn gyfrifol am gi peryglus ac allan o reolaeth mewn man cyhoeddus.

Cyfaddefodd hefyd i gyhuddiad o fod ag arf ymosodol yn ei feddiant mewn man preifat. 

Fis Hydref diwethaf, galwyd swyddogion i gyfeiriad yn The Crescent, Nant-y-glo, yn dilyn adroddiadau am ymosodiad gan gi ar blentyn. 

Atafaelwyd y ci a chafodd ei ddifa heb ddioddef gan filfeddyg. Yn ddiweddarach cafodd ei adnabod fel XL bully – brid sydd wedi ei wahardd. Nid oedd Allison wedi cofrestru’r ci chwaith. 

Meddai Ditectif Brif Arolygydd Virginia Davies, yr uwch swyddog ymchwilio: 

“Methodd Allison â chadw ei gi o dan reolaeth ac ymosodwyd yn ffyrnig ar ferch, gan achosi anafiadau difrifol.

“Hoffem ddymuno’r gorau iddi hi gyda’i hadferiad yn dilyn yr ymosodiad yma.

"Dylai’r achos hwn atgoffa pawb sy’n berchen ar gi o bwysigrwydd cadw eich ci dan reolaeth trwy’r amser.  

 

"Rydyn ni’n ystyried adroddiadau am berchnogaeth anghyfrifol ar gŵn yn ddifrifol iawn a gofynnwn yn daer ar bawb i ddilyn y ddeddfwriaeth a’r canllawiau er mwyn atal digwyddiadau fel yr un yma rhag digwydd yn y dyfodol.”

Carcharwyd Allison am dair blynedd a chafodd ei wahardd rhag bod yn berchen ar gŵn am 10 mlynedd. 

Gallwch riportio perchnogion cŵn anghyfrifol ar ein gwefan, trwy anfon neges uniongyrchol atom ni ar y cyfryngau cymdeithasol neu drwy ffonio 101. 

Ffoniwch 999 bob tro mewn argyfwng.