Chwilio am ddynion ar ôl ymgais i ddwyn beic trydan yng Nghwmbrân

Rydym yn apelio am wybodaeth i gynorthwyo gyda’n hymchwiliad i ymgais i ddwyn yng Nghwmbrân ddydd Llun 30 Rhagfyr.

Ceisiodd dau ddyn, a welwyd ar foped du, ddwyn beic trydan o’r tu allan i siop Cwrt Bleddyn, rhwng Cocker Avenue a Glyntirion, am tua 4.10pm.

Cafodd y ddau, a oedd yn gwisgo dillad du a chapiau balaclafa, ei herio gan berchennog y beic y tu allan i’r siop cyn gadael yn waglaw i gyfeiriad Cocker Avenue.

Dywedodd y Ditectif Arolygydd Elaine Newbury:

“Mae ymchwiliadau yn parhau i nodi’r ddau ddyn hyn a geisiodd ddwyn beic trydan o’r tu allan i’r siop, a hoffem glywed gan unrhyw un a oedd yng nghyffiniau’r siop rhwng 4pm a 4.30pm ar y diwrnod hwnnw.

“Rydym yn credu y gallai’r bobl hyn fod yn gysylltiedig hefyd â lladrad arall yng Nghwmbrân, a riportiwyd yn Dorallt Close, yn ddiweddarach y diwrnod hwnnw pan gafodd beic trydan ei gymryd oddi wrth fachgen yn ei arddegau.

“Rydym hefyd wedi cael sawl galwad gan y cyhoedd gyda gwybodaeth ac rydym yn ddiolchgar am eu cymorth fel rhan o’n hymchwiliadau yn dilyn y troseddau hyn a riportiwyd i ni.

“Mae swyddogion wedi arestio dyn 22 oed o Gasnewydd mewn cysylltiad â’r ymchwiliad hwn, ac mae wedi cael ei ryddhau ar fechnïaeth wrth i’r ymchwiliad barhau.

“Rhannwyd ffotograff o ddyn ar ein sianel cyfryngau cymdeithasol fel rhan o’r apêl yn gynharach yn yr wythnos; nid yw’r person hwn dan amheuaeth ac ni chredir ei fod yn gysylltiedig â’r ymgais i ddwyn y beic trydan mewn unrhyw ffordd. Rydym yn cydnabod y camgymeriad hwn ac rydym wrthi’n ystyried y prosesau sydd ar waith gennym ar gyfer rhyddhau deunydd ar gyfer apeliadau i’r cyhoedd.”   

Gofynnir i unrhyw un sydd â gwybodaeth, gan gynnwys recordiadau dashcam neu deledu cylch cyfyng, anfon neges uniongyrchol ar gyfryngau cymdeithasol, neu drwy ein gwefan, gan ddyfynnu cyfeirnod 2400428652.

Fel arall, gallwch ffonio Crimestoppers yn ddienw ar 0800 555111 neu gysylltu drwy ei wefan.