Arolygydd Coed-duon yn canmol ysbryd y gymuned ar ôl wythnos o weithredu pwrpasol

Gweithiodd swyddogion cymdogaeth yn agos gyda phartneriaid i weithredu gwarantau a chwiliadau i fynd i’r afael ag ymddygiad gwrthgymdeithasol.

Mae Arolygydd Chris Hopkin wedi canmol agosatrwydd a natur agored a chefnogol y gymuned yn dilyn wythnos o waith gan yr heddlu i “gryfhau’r gwelliannau a welwyd yn y dref yn yr wythnosau diweddar”.

Cyn Ffair y Gwanwyn Coed-duon ddydd Sadwrn 8 Mawrth, cynhaliodd ei dîm plismona cymdogaeth gyfres o gymorthfeydd yr heddlu a sesiynau ymgysylltu i siarad â thrigolion am y gwaith rydyn ni wedi ei wneud yn y misoedd diwethaf i roi sylw i adroddiadau am ymddygiad gwrthgymdeithasol.

Yn ôl ym mis Ionawr, bu cynnydd yn nifer y galwadau ynghylch anhrefn o gwmpas Market Square a’r orsaf bysys, gan gymell swyddogion i ddefnyddio dull pwrpasol i fynd i’r afael â’r broblem.

Roedd hyn yn cynnwys mwy o batrolau, defnyddio hysbysiadau gwasgaru a gwaith gorfodi i dargedu’r rheini a oedd yn gyfrifol.

Yn ystod yr ymgyrch, arestiodd swyddogion ferch 17 oed o’r ardal a’i chyhuddo o nifer o droseddau, gan gynnwys torri hysbysiad gwarchod y gymuned.

Ers hynny, fodd bynnag, mae’r Arolygydd Plismona Cymdogaeth ar gyfer yr ardal yn dweud bod pethau wedi gwella.

Meddai Arolygydd Hopkin: “Ym mis Ionawr, cawsom ryw 40 adroddiad yn ymwneud ag ymddygiad gwrthgymdeithasol neu ddifrod troseddol cysylltiedig, sy’n gwbl annerbyniol.

“Mae’r cyhoedd yn gwybod y gallai’r ymddygiad difeddwl yma achosi oedi i’n swyddogion wrth iddyn nhw geisio cyrraedd galwadau brys lle mae pobl agored i niwed angen help, a bod pobl sy’n ymddwyn yn afreolus yn gallu ein rhwystro ni rhag cyrraedd y digwyddiadau yma’n gyflym.

“Fodd bynnag, mae’r tîm wedi mynd i’r afael â’r broblem yn effeithiol, ac mae adroddiadau wedi gostwng i ryw bedwar galwad yn ystod y pythefnos diwethaf.

“Yn ystod y cyfnod yn arwain at y ffair y penwythnos diwethaf, gwnaethom drefnu nifer o sesiynau ymgysylltu yn y dref i ddiweddaru’r cyhoedd am y gwaith yma, a hefyd i siarad â thrigolion am unrhyw bryderon sydd ganddyn nhw, neu wybodaeth sydd ganddyn nhw am drosedd yn yr ardal.”

Mewn digwyddiad ar wahân yn y dref, derbyniodd swyddogion adroddiad am anhrefn treisgar brynhawn Iau 13 Chwefror.

Ychwanegodd Arolygydd Hopkin: “Er bod digwyddiadau treisgar fel hynny’n brin iawn yn yr ardal, rwyf yn gobeithio bod pobl wedi cael tawelwch meddwl o weld bod y swyddogion wedi cyrraedd y safle mor gyflym ac wedi arestio’r rheini roedden ni’n credu oedd yn gyfrifol.

“Yn ystod yr wythnos ddiwethaf rydyn ni wedi gweithio gyda phartneriaid i gynnal cyfres o warantau a chwiliadau hefyd.

“Ddydd Gwener 7 Mawrth, gwnaethom roi cymorth i dîm Safonau Masnachu Cyngor Bwrdeistref Sirol Caerffili, a oedd yn chwilio eiddo masnachol yr oedden nhw’n amau oedd yn gwerthu fêps a thybaco anghyfreithlon.
“Ar y diwrnod, atafaelodd y tîm 168 o fêps nad oeddent yn cydymffurfio â’r gyfraith, 3,580 o sigaréts, a 33 pwrs 50g o dybaco y credir oedd yn ffug. Mae ymchwiliadau’n parhau.”

“Yn ogystal, cynhaliodd swyddogion Safonau Masnachu brofion gwerthu dan oed yn yr ardal a chawsant eu calonogi bod pob gwerthwr wedi gwrthod gwerthu’r fêps i’r gwirfoddolwyr ifanc, gan ofyn am ddogfennau adnabod bob tro.”

Dywedodd y Cynghorydd Philippa Leonard, aelod cabinet Cyngor Bwrdeistref Sirol Caerffili dros Gynllunio a Diogelu’r Cyhoedd: “Mae masnachu tybaco a fêps anghyfreithlon yn gysylltiedig â throsedd trefnedig ac mae’n niweidiol i’n hiechyd, yn arbennig iechyd pobl ifanc.

“Mae tynnu'r rhain oddi ar y stryd yn ganlyniad go iawn. Nid yn unig mae’r fasnach yn rhoi arian ym mhocedi troseddwyr, mae hefyd yn niweidio ein cymunedau lleol a busnesau cyfreithlon.

“Hoffwn ddiolch i’r tîm safonau masnachu a Heddlu Gwent am gymryd y cynhyrchion peryglus yma oddi ar y silffoedd.”

Os oes gennych chi bryderon am drosedd neu ymddygiad gwrthgymdeithasol yn eich ardal, riportiwch y mater wrthym ni ar y wefan, drwy ffonio 101, neu drwy anfon neges atom ni ar y cyfryngau cymdeithasol er mwyn i ni weithredu.

Fel arall, gallwch gysylltu â Crimestoppers yn ddienw ar 0800 555 111, neu ar eu gwefan.