Pump o bobl yn y ddalfa ar ôl i swyddogion dargedu grŵp troseddau trefnedig
Cynnwys y prif erthygl
Mae swyddogion Gwent wedi arestio pump o bobl yn ystod ymgyrchoedd ben bore mewn cyfeiriadau ym Mlaenau Gwent maen nhw’n credu sy’n gysylltiedig â grŵp trosedd trefnedig.
Ymunodd ditectifs a swyddogion mynediad arbenigol gyda’r tîm plismona cymdogaeth wrth iddyn nhw weithredu gwarantau mewn pum cyfeiriad ar draws Brynmawr a Thredegar.
Defnyddiwyd llifiau ôl a blaen a dyrnhyrddod wrth i swyddogion ddefnyddio grym i fynd i mewn i’r adeiladau cyn cynnal chwiliadau manwl.
Arestiodd swyddogion dri dyn o Frynmawr, 19, 22 a 38 oed, a dau o Dredegar, 22 a 28 oed, pob un ohonynt ar amheuaeth o gynllwynio i gyflenwi cyffuriau dosbarth A.
Yn ystod y chwiliadau yma, atafaelodd swyddogion gocên, geriach cysylltiedig â chyffuriau, a ffonau symudol.
Meddai Cwnstabl Heddlu Lewis Iles, swyddog yn yr achos:
"Mae mynd i’r afael â chyflenwi cyffuriau, chwalu llinellau cyffuriau ac amddiffyn y cyhoedd rhag cyffuriau anghyfreithlon, a’r troseddau sy’n gysylltiedig â nhw, yn flaenoriaeth i ni.
"Mae tri pherson dan amheuaeth, yr ydym yn credu sy’n gysylltiedig â grŵp troseddau trefnedig difrifol sy’n llenwi strydoedd Blaenau Gwent gyda chyffuriau dosbarth A, yn y ddalfa yn aros i gael eu cyfweld.
"Mae ymgyrchoedd fel y rhain yn bosibl diolch i’r rhan hollbwysig mae ein cymunedau’n ei chwarae yn rhannu eu pryderon gyda ni.
“Rydyn ni’n gobeithio bod y gwarantau yma’n dangos bod unrhyw wybodaeth mae’r cyhoedd yn gallu ei rhoi i ni am gyffuriau anghyfreithlon yn gallu gwneud gwahaniaeth enfawr ac arwain at arestio pobl felly, da chi, daliwch i rannu eich pryderon a gwybodaeth gyda ni.”
Os oes gennych chi unrhyw bryderon neu wybodaeth am gyffuriau anghyfreithlon yn eich cymuned, rhowch wybod i ni drwy ffonio 101 neu drwy anfon neges uniongyrchol atom ni ar ein tudalennau Facebook neu X, er mwyn i ni weithredu.
Fel arall, gallwch ffonio Crimestoppers yn ddienw ar 0800 555 111 gyda gwybodaeth.