Heddlu Gwent yn llofnodi siarter yn ymrwymo i ddull newydd o gefnogi pobl sydd wedi cael eu heffeithio gan drychinebau cyhoeddus
Cynnwys y prif erthygl
Bydd Prif Gwnstabl Mark Hobrough yn bresennol mewn digwyddiad lansio ym Merthyr Tudful ddydd Mawrth 18 Mawrth.
Mae sefydliadau ledled Cymru wedi llofnodi siarter yn amlinellu eu hymrwymiad i ymateb i drychinebau cyhoeddus mewn ffordd agored, dryloyw ac atebol.
Mae’r Siarter ar gyfer Teuluoedd sydd wedi Dioddef Profedigaeth yn sgil Trychineb Cyhoeddus yn galw am newid diwylliannol yn ymgysylltiad cyrff cyhoeddus â theuluoedd sydd wedi dioddef profedigaeth, gan sicrhau bod gwersi trychineb Hillsborough ym 1989 a'i ganlyniadau yn cael eu dysgu i atal y rhai y mae trychineb cyhoeddus yn effeithio arnynt yn y dyfodol rhag cael yr un profiad.
Mae Heddlu Gwent wedi ymuno â sefydliadau ledled Cymru, gan gynnwys Llywodraeth Cymru, awdurdodau lleol, heddluoedd eraill a Gwasanaeth Ambiwlans Cymru a gwasanaethau tân ac achub, i ymrwymo i gefnogi teuluoedd sydd wedi dioddef profedigaeth a’r gymuned cyn, yn ystod ac ar ôl digwyddiad mawr.
Bydd Prif Gwnstabl Mark Hobrough yn bresennol mewn digwyddiad lansio ym Merthyr Tudful ddydd Mawrth 18 Mawrth.
Yn ystod y digwyddiad bydd Esgob James Jones KBE, a ysgrifennodd y siarter yn rhan o’i adroddiad ar wersi a ddysgwyd yn sgil trychineb Hillsborough, yn ymuno â phobl sydd wedi dioddef profedigaeth a goroeswyr trychinebau cyhoeddus, gan gynnwys Hillsborough, Tŵr Grenfell, Arena Manceinion ac Aberfan, sydd ychydig filltiroedd o leoliad y lansiad.
Meddai Esgob Jones: “Heddiw mae Cymru’n arwain y ffordd gyda dros 50 o’i chyrff cyhoeddus yn llofnodi’r siarter.
“Trwy wneud hyn, mae diwylliant y sefydliadau wedi dechrau newid ac mae ymrwymiad o’r newydd i wasanaeth cyhoeddus ac i barchu dyngarwch y rhai rydyn ni’n cael ein galw i’w gwasanaethu.
“Mae’r siarter yn cynrychioli addewid na fydd unrhyw un yn cael ei adael i ymdopi â’i brofedigaeth a’i oroesiad ar ben ei hun ar ôl unrhyw drychineb yn y dyfodol, ac na fydd rhaid i unrhyw un eto ddioddef 'The Patronising Disposition of Unaccountable Power'.
“Mae hon yn foment allweddol ym mywyd y genedl wrth i ni groesawu egwyddorion y siarter ac ymrwymo i barchu dyngarwch ei holl ddinasyddion a ddylai fod wrth galon pob gwasanaeth cyhoeddus.”
Meddai Prif Gwnstabl Heddlu Gwent, Mark Hobrough: “Bydd unrhyw un sy’n cael eu heffeithio’n agos gan drychineb cyhoeddus wedi profi profedigaeth a dioddefaint enfawr ac annirnadwy oherwydd effaith a chanlyniadau’r digwyddiad a’u colled personol eu hunain.
"Cydymdeimlwn â phawb sydd wedi profi trychinebau o’r fath.
"Trwy lofnodi’r siarter yma, rydym yn ymrwymo i ddarparu gwasanaethau rhagorol, gofalgar, sy’n diwallu anghenion y cyhoedd yn dilyn trychineb ac ymhell i’r dyfodol.
“Yng Ngwent, mae ein cymunedau wrth galon popeth rydyn ni’n ei wneud.
“Byddwn yn gwreiddio’r siarter yma yn ein gwaith i sicrhau ein bod yn gallu rhoi cymorth cynhwysol a charedig i’r cyhoedd, y gallan nhw ymddiried ynddo bob amser.”