Diogelu eich ffôn symudol

Sut mae lladron yn eich targedu chi

I helpu i gadw’ch ffôn llaw a’ch data yn ddiogel dilynwch yr awgrymiadau hyn:

• Peidiwch â gadael eich ffôn heb neb yn gofalu amdano, allan o’ch golwg, neu wedi’i adael ar fwrdd. Gall lladron gipio ffôn oddi ar fwrdd mewn eiliadau neu gallant dynnu eich sylw i’w gymryd.
• Cadwch lygad ar bwy sydd o’ch cwmpas pan fyddwch yn defnyddio’ch ffôn yn gyhoeddus. Mae lladron yn defnyddio ‘syrffio dros ysgwydd’ (edrych dros eich ysgwydd) i’ch gwylio neu’ch ffilmio’n nodi codau pas neu i weld eich data.
• Peidiwch â nodi gwybodaeth bersonol mewn man cyhoeddus a, lle bynnag y bo modd, defnyddiwch ddilysiad biometrig, megis ID Wyneb neu Olion Bysedd, i gael mynediad at eich ffôn ac apiau sensitif yn hytrach na chodau pas.
• Peidiwch byth â rhoi eich ffôn i bobl nad ydych chi’n eu hadnabod neu rhai rydych newydd eu cyfarfod. Gall lladron ofyn am fenthyg eich ffôn neu gynnig nodi eu rhif. Peidiwch â gadael iddynt
• Rhowch eich ffôn i gadw pan fyddwch wedi gorffen ei ddefnyddio.

Diogelu eich ffôn rhag ofn iddo gael ei ddwyn

Os nad yw eich ffôn wedi’i ddiogelu’n dda a’i fod yn cael ei ddwyn neu ei golli, gallai lladron gael mynediad at eich apiau bancio, mynd i mewn i gyfrifon personol, a hyd yn oed dwyn eich hunaniaeth.

Ystyriwch a oes angen i apiau sy’n cynnwys gwybodaeth bersonol sensitif, megis apiau bancio, fod ar eich ffôn o gwbl. Efallai y byddai’n well cadw rhai ar ddyfais llechen neu ddyfais arall nad ydych chi’n ei chario o gwmpas gyda chi fel arfer.

Defnyddiwch nodwedd cloi eich ffôn

Dewiswch PIN, cod pas, cyfrinair neu batrwm cryf, neu defnyddiwch ddilysiad biometrig, megis ID Wyneb neu Olion Bysedd. Mae cyfrineiriau’n anoddach i’w ‘syrffio dros ysgwydd’ na chodau PIN byr.

Gosodwch y clo awtomatig i actifadu ei hun ar ôl cyfnod byr o amser.

Actifadwch y diogelwch gwrth-ladrad sydd wedi’i gynnwys yn eich ffôn

Ar gyfer iPhone, defnyddiwch ‘Stolen Device Protection’ i atal gosodiadau diogelwch allweddol eich ffôn rhag cael eu newid os caiff ei ddwyn.

Cuddiwch apiau megis apiau bancio mewn ffolderi cudd drwy:

• bwyso a dal yr ap
• pwyso ‘Require Face ID’
• pwyso ‘Hide and Require Face ID’

Gallwch gael canllawiau pellach ar sut i wneud hyn yn Apple Support (DU).

Ar gyfer ffonau Android, defnyddiwch ‘Theft Detection Lock’ i actifadu nodwedd synhwyro symudiad eich dyfais. Bydd eich ffôn yn cloi’n awtomatig os yw’n canfod symudiad anarferol, er enghraifft, os caiff ei gipio.

Gallwch hefyd guddio apiau mewn ffolderi diogel. Mae hyn yn caniatáu i’r ffolder gael ei chloi gyda chod pas gwahanol i’r ddyfais ei hun. Mae canllawiau pellach ar sut i wneud hyn ar dudalennau cymorth gwneuthurwr eich ffôn.

Cofnodwch eich rhif IMEI

Gall rhif IMEI (International Mobile Equipment Identity) eich ffôn helpu i adnabod eich ffôn os caiff ei golli neu ei ddwyn. Gallwch gael y rhif IMEI drwy deipio *#06# ar fysellbad eich ffôn. Cadwch nodyn ohono yn rhywle heblaw am ar eich ffôn. 

Cadwch eich meddalwedd wedi’i ddiweddaru’n rheolaidd

Bydd hyn yn sicrhau bod gan eich dyfais a’ch apiau y gosodiadau diogelwch diweddaraf. Gallwch osod eich ffôn i ddiweddaru’n awtomatig yn y ddewislen gosodiadau.

Defnyddiwch ap olrhain

Fe allech ystyried gosod ap olrhain ar eich ffôn fel y gallwch weld ei leoliad o ddyfais arall megis gliniadur. Defnyddiwch ef cyn gynted â phosibl, cyn i ladron gael cyfle i’w analluogi.

Diffoddwch ragolygon negeseuon

Diffoddwch ragolygon negeseuon, fel na fydd lladron yn gweld unrhyw negeseuon am godau ailosod neu fewngofnodi pan fydd eich ffôn wedi’i gloi.

Diogelwch apiau gwerth uchel

Diogelwch apiau gwerth uchel, megis apiau bancio a waledi digidol, y tu ôl i ddulliau adnabod biometrig. Neu defnyddiwch gyfrineiriau cryf nad ydych yn eu defnyddio ar gyfrifon eraill. Peidiwch byth â storio’r cyfrineiriau hyn ar ffeil ‘nodyn’ ar eich ffôn lle gallai lleidr ddod o hyd iddynt.

Gwnewch yn siŵr eich bod yn dal i allu cael mynediad at eich data

Gwnewch yn siŵr:

• bod copi wrth gefn o ddata eich ffôn yn cael ei wneud yn rheolaidd
• bod rhywle ar wahân i’ch ffôn lle gallwch gael codau mynediad wedi’u hanfon (codau dilysu dau gam) i ddilysu mynediad o ddyfais arall
• eich bod yn cadw gwybodaeth bwysig megis rhifau ffôn teulu a ffrindiau a chyfrineiriau yn rhywle arall, nid ar eich ffôn yn unig
• bod ffotograffau o ddogfennau adnabod sydd wedi’u storio ar eich ffôn wedi’u cuddio y tu ôl i gyfrineiriau neu gall lladron eu defnyddio i wneud cais am fenthyciadau yn eich enw. Gellir diogelu ffotograffau mewn ffolderi cudd hefyd

Cymorth i osod eich ffôn

Gweler tudalennau cymorth eich dyfais i gael cymorth gydag olrhain lleoliad dyfais, adfer cyfrifon a gosodiadau rhagolwg negeseuon.

Tudalennau cymorth Apple ar gyfer iPhone

Tudalennau cymorth Google ar gyfer ffonau Android

Gallwch hefyd gyfeirio at wefan gwneuthurwr eich ffôn i gael cymorth.

Os caiff eich ffôn ei ddwyn

Efallai y bydd eich data personol mewn perygl. Mae’n bwysig eich bod yn gweithredu’n gyflym.

Rhowch wybod i ni am y drosedd cyn gynted ag y gallwch.

Os ydych wedi cael eich anafu, yn teimlo’n anniogel neu os yw’r drosedd newydd ddigwydd ffoniwch 999.

Gallwch hefyd roi gwybod i ni am y drosedd ar-lein. Neu ffoniwch 101 ar gyfer achosion nad ydynt yn argyfwng.

Cynhwyswch fanylion eich dyfais (megis y rhif IMEI) yn eich adroddiad yn ogystal ag unrhyw drafodion twyllodrus.

Dylech: 

• rwystro eich ffôn gan ddefnyddio dyfais arall. Gallwch ddefnyddio ‘Remote Lock’ ar Android (mae angen actifadu hwn yn eich gosodiadau yn gyntaf) neu ‘Lost Mode’ ar iPhone
• cysylltu ag unrhyw fanciau a darparwyr ariannol eraill fel y gallant ganslo neu rewi unrhyw gyfrifon sy’n gysylltiedig â’ch ffôn
• newid cyfrineiriau ar gyfer unrhyw apiau neu gyfrifon sensitif sydd ar eich ffôn. Dylech wneud hyn ar gyfer eich apiau e-bost, cyfryngau cymdeithasol ac apiau bancio yn gyntaf
• gorfodi pob dyfais ac ap i allgofnodi o’ch cyfrifon a hysbysu eich darparwr ffôn fel nad yw negeseuon 2SV yn cael eu hanfon at eich rhif. Dylech hefyd roi eich rhif IMEI iddynt fel y gallant rwystro’ch dyfais

Os ydych yn amau ​​twyll

Cadwch lygad am weithgarwch anarferol yn unrhyw un o’ch cyfrifon banc sy’n gysylltiedig â’ch ffôn. Mae hyn yn cynnwys trafodion na wnaethoch chi eu gwneud neu hysbysiadau e-bost am fewngofnodi i gyfrif.

Os ydych chi’n amau ​​​​bod rhywun wedi dwyn eich manylion, dylech chi roi gwybod i’ch banc ar unwaith. Dylech hefyd newid y cyfrineiriau ar gyfer apiau.

Gall eich banc ad-dalu unrhyw drafodion a wneir ar ôl i’ch ffôn gael ei riportio wedi’i ddwyn.