Cyfiawnder adferol

Beth yw cyfiawnder adferol?

Mae cyfiawnder adferol yn rhoi cyfle i bobl sydd wedi’u niweidio gan drosedd a'r bobl sy'n gyfrifol am y niwed i rannu sut mae'r drosedd wedi effeithio arnyn nhw. Mae'n gadael i bawb sy'n gysylltiedig â’r peth chwarae rhan yn y gwaith o atgyweirio'r niwed a dod o hyd i ffordd gadarnhaol ymlaen.

Gall y cyfathrebu fod yn gyfarfod wyneb yn wyneb neu lythyr, cyfweliad sain wedi'i recordio neu fideo.

Gall pob dioddefwr trosedd geisio cyfiawnder adferol ond dim ond os yw’r dioddefwr a’r troseddwr yn dymuno hynny y bydd y broses yn digwydd.

Mae cyfiawnder adferol yn gwbl wirfoddol i bawb sy'n cymryd rhan. Mae hwyluswyr sydd wedi’u hyfforddi yn asesu’r risgiau ac yn sicrhau bod y broses yn ddiogel i bawb.

Mae cyfiawnder adferol yn cael ei ddefnyddio ar gyfer unrhyw fath o drosedd ac ar unrhyw gyfnod yn y broses cyfiawnder troseddol, gan gynnwys os yw'r troseddwr yn treulio dedfryd yn y carchar.

I gael rhagor o wybodaeth, ewch i wefan y Cyngor Cyfiawnder Adferol.