Os ydych chi wedi cael llythyr ysgogi camera cyflymder

Mae angen i chi lenwi a llofnodi rhan un/adran A yr hysbysiad a’i ddychwelyd i’r cyfeiriad a ddangosir ar y ffurflen o fewn 28 diwrnod.

Fel arfer wedyn, byddwch yn cael cynnig amodol o gosb benodedig, sef dirwy o £100 ac ychwanegu tri phwynt cosb at eich trwydded. Er hynny, efallai y byddwch yn gymwys i wneud cwrs Cynllun Ailhyfforddi Troseddwyr Gyrru Cenedlaethol yn lle hynny.

Os na fyddwch yn ymateb i'r hysbysiad caiff eich achos ei gyfeirio i'r llys oherwydd i chi fethu â darparu'r wybodaeth y gofynnwyd amdani i’r Heddlu.

Peidiwch ag anfon unrhyw daliad na'ch trwydded yrru at yr Heddlu.

Troseddau cyflymder uchel

Os ydych chi wedi cael eich recordio ar yr hyn sy’n cael ei ystyried yn gyflymder uchel caiff y digwyddiad ei atgyfeirio i’r llys yn y lle cyntaf. Bydd yn dal angen i chi ddychwelyd y ffurflen wedi’i llenwi ac unwaith y bydd wedi’i phrosesu byddwch yn derbyn gwŷs llys.

Os oes gennych naw pwynt ar eich trwydded yn barod

Mae angen ichi lenwi a llofnodi rhan un/adran A o'r hysbysiad a'i dychwelyd i'r cyfeiriad ar flaen y ffurflen o fewn 28 diwrnod.

Efallai y byddwch yn gymwys i wneud cwrs Cynllun Ailhyfforddi Troseddwyr Gyrru Cenedlaethol, ond os nad ydych, yna caiff y mater ei gyfeirio at y llys.

Cyrsiau ymwybyddiaeth gyrwyr

Efallai y byddwch yn gymwys i wneud cwrs Cynllun Ailhyfforddi Troseddwyr Gyrru Cenedlaethol:

• os oedd eich cyflymder ychydig bach yn fwy na'r terfyn ac yn dod o fewn y canllawiau a nodwyd gan Gyngor Cenedlaethol Prif Swyddogion yr Heddlu (NPCC) hyd at:
  • 31 mya mewn ardal 20 mya
  • 42 mya mewn ardal 30 mya
  • 53 mya mewn ardal 40 mya
  • 64 mya mewn ardal 50 mya
  • 75 mya mewn ardal 60 mya
  • 86 mya mewn ardal 70 mya
• os nad ydych eisoes wedi cwblhau cwrs o fewn tair blynedd neu wedi trefnu lle ar gwrs sydd yn yr arfaeth
• os gallwch anfon manylion cywir eich trwydded yrru aton ni a'ch dyddiad geni. Os ydych yn wladolyn tramor ac wedi cael trwydded gan y DVLA yna rhowch fanylion y drwydded a roddwyd gan y DVLA. Os nad oes gennych drwydded y DU yna mae’n rhaid i chi anfon rhif y drwydded a’r wlad a roddodd eich trwydded nad sy’n un y DU atom.

Sylwch: Does dim hawl gyfreithiol i gael cwrs. Mae cwrs yn cael ei gynnig yn ôl disgresiwn yr heddlu yn unig, a does gan y llysoedd ddim pwerau ynglŷn â chyrsiau. Os cynigir cwrs ichi, mae'r heddlu'n rhydd i dynnu'r cynnig yn ôl unrhyw bryd hyd at y pwynt pan fo’r cwrs wedi'i gwblhau'n llwyddiannus.