Arfau tanio a chymorth iechyd meddwl

Nid yw JavaScript wedi'i alluogi

Heb JavaScript ni fydd ffurflenni'n gweithio.

Mae'r tudalen yma yn esbonio'r cymorth sydd ar gael ichi, a'r cyfrifoldebau sydd gennych, os ydych chi'n cael trafferth gyda'ch iechyd meddwl. Os ydych chi'n ddeiliad tystysgrif arfau tanio, efallai y byddwch chi'n poeni am ddweud nad ydych chi'n teimlo'n iawn. Rydyn ni’n trin pob pryder mewn ffordd gefnogol ac amyneddgar. Peidiwch â bod ofn ceisio help – dyma'r peth iawn i'w wneud i chi, eich teulu, eich ffrindiau a'ch cymuned.

1. Mae'n fwy cyffredin nag rydych chi'n feddwl

2. Gadewch inni gyd weithio gyda'n gilydd

3. Eich cyfrifoldeb chi

4. Rôl timau trwyddedu arfau tanio'r heddlu

5. Ble i droi i gael help

Mae'n fwy cyffredin nag rydych chi'n feddwl

Mae 1 ym mhob 4 o bobl yn debygol o brofi hwyliau isel, iechyd meddwl gwael neu drallod yn ystod eu hoes. Deialog agored am sut rydych chi'n teimlo yw'r cam pwysicaf i'w gymryd wrth ddelio â'r syniadau hyn. O ran eu hiechyd meddwl eu hunain, mae ar aelodau o'r gymuned saethu angen perthynas gadarnhaol ac agored gyda phobl sy'n agos atyn nhw. Mae hyn yn cynnwys sefydliadau a rhwydweithiau cymorth.

Gall iechyd meddwl effeithio ar unrhyw un. Mae'n bwysig siarad am hyn a cheisio'r help sydd arnoch ei angen. Os ydych chi'n cael trafferth gyda'ch iechyd meddwl, ewch at eich meddyg teulu cyn gynted â phosibl.

Gall cyrff saethu ac amrywiol elusennau eraill roi mwy o gymorth. Hefyd, mae therapïau llafar neu seicolegol yn driniaethau effeithiol a chyfrinachol sy’n cael eu darparu gan weithwyr proffesiynol. Gallan nhw helpu os ydych chi'n cael trafferth gyda theimladau o iselder, pryder, gorbryder, PTSD, a chyflyrau eraill. Yng Nghymru a Lloegr, gallwch eich cyfeirio’ch hun at therapïau llafar neu gall eich meddyg teulu eich cyfeirio at y cymorth cywir i chi.

Gadewch inni i gyd weithio gyda'n gilydd

Rhaid i bawb sy'n ymwneud â thrwyddedu arfau tanio gydweithio. Mae angen inni ddatrys pryderon, wrth inni drin pob mater mewn ffordd gefnogol ac amyneddgar.

Mae'n bwysig eich bod chi'n gwybod y gallwch chi wneud gwahaniaeth wrth helpu i gadw pawb yn ddiogel.

Gall siarad â rhywun sy'n profi heriau iechyd meddwl, neu fod yn agored ynghylch eich heriau eich hun fod o fudd enfawr.

Eich cyfrifoldeb chi

Os oes gennych dystysgrif, mae'n bwysig dweud wrth yr heddlu am gyflwr meddygol perthnasol. Mae canllawiau statudol trwyddedu arfau tanio y Swyddfa Gartref yn disgrifio hyn. Dyma'r peth iawn i'w wneud, i gadw pawb yn ddiogel.

Rôl timau trwyddedu arfau tanio'r heddlu

Y flaenoriaeth i dimau trwyddedu arfau tanio yr heddlu yw sicrhau diogelwch y cyhoedd. Dyw hynny ddim yn golygu y bydd pob achos o iechyd meddwl gwael yn arwain at golli tystysgrifau. Os bydd rhaid i'r heddlu asesu unrhyw bryderon ynghylch deiliad tystysgrif, byddan nhw’n trin pob achos ar ei ben ei hun gyda gofal a chydbwysedd.

Bydd ar yr unigolyn angen cymorth, amser a lle. Bydd angen i'r heddlu asesu unrhyw risg i ddeiliad y dystysgrif, y bobl o'u cwmpas a'r cyhoedd ehangach. Efallai mai'r opsiwn mwyaf priodol yw cymryd rheolaeth dros gynnau unigolyn, dros dro.

I wneud penderfyniad gwybodus, bydd yr heddlu’n casglu gwybodaeth ac fe allen nhw siarad â’r canlynol:

teulu
ffrindiau
canolwyr
cyflogwyr
sefydliadau saethu

Gallen nhw ysgrifennu at feddyg teulu'r unigolyn neu siarad â nhw, a hynny er mwyn cadarnhau unrhyw ddiagnosis meddygol, sut mae unrhyw salwch yn effeithio ar eu bywyd, a sut maen nhw'n ymdopi.

Ar ôl i'r heddlu asesu, gallan nhw benderfynu:

Dychwelyd y gynnau i ddeiliad y dystysgrif, os yw'n briodol gwneud hynny
Storio’r gynnau i ffwrdd o gartref y perchennog
Gosod amodau ar dystysgrif arfau tanio
Awgrymu eu bod yn ildio’u tystysgrifau, ac yn gwneud cais eto pan fydd eu hiechyd yn gwella
Dirymu'r tystysgrifau, os yw'n briodol, ac os oes angen hynny er mwyn sicrhau diogelwch y cyhoedd