Gwerthu neu waredu arf tanio

Cyn ichi werthu neu waredu arf tanio neu ddryll, mae rhai camau y mae angen ichi eu cymryd.

Gwerthu arf tanio

Rhaid ichi sicrhau bod gan y prynwr y caniatâd cywir i fod yn berchen ar yr arf tanio. Gwiriwch yr awdurdod ar eu tystysgrif arfau tanio.

Dylech chi ddangos diwydrwydd dyladwy trwy wneud gwiriadau i sicrhau bod tystysgrif arf tanio y prynwr yn ddilys.

Bydd eu tystysgrif yn nodi nifer, math a safon yr arfau tanio y cân nhw fod yn berchen arnyn nhw. Bydd hefyd yn nodi faint o fwledi neu getris y cân nhw fod yn berchen arnyn nhw.

Ar gefn tystysgrif y prynwr, bydd angen ichi lenwi:

• Tabl 1 (yn achos arfau tanio) neu
• Tabl 2 (yn achos drylliau)

Ar ôl i chi werthu'r arf tanio neu'r dryll mae angen ichi ddweud wrth yr heddlu a roddodd eich tystysgrif. Gallwch wneud hyn ar-lein drwy ddefnyddio’n ffurflen trosglwyddo perchnogaeth.

Gwaredu arf tanio

Peidiwch byth â thaflu arfau i ffwrdd, gan y gallen nhw fynd i'r dwylo anghywir.

Os oes gennych chi arf tanio neu ddryll yr hoffech ei waredu, rhaid ichi wneud hynny yn un o'r ffyrdd canlynol.

Gwerthwr arfau tanio neu ddeiliad tystysgrif

Gallwch roi eich arf tanio neu’ch dryll i naill ai:

• gwerthwr arfau tanio cofrestredig, neu
• deiliad tystysgrif arfau tanio (dim ond os oes ganddyn nhw'r awdurdod i gario'r math hwnnw o arf)

Ar ôl ichi wneud hyn, bydd angen ichi roi gwybod i ni trwy ddefnyddio’n ffurflen ar-lein.

Heddlu

Os hoffech chi ildio arf tanio neu ddryll i'r heddlu, gallwch ffonio 101 neu gysylltu â ni ar-lein. Byddwn yn dweud wrthoch chi am y ffordd orau i fynd ati.

Peidiwch â dod â'ch arf tanio i orsaf heddlu oni bai ein bod wedi gofyn ichi wneud hynny. Cadwch yr arf tanio yn ddiogel a pheidiwch â'i symud nes ichi gael cyfarwyddyd.

Peidiwch â phoeni os oes gennych chi arf na ddylai fod yn perthyn ichi. Rydych chi'n ymddwyn yn gyfrifol trwy ddewis ei ildio i ni. Fydd dim camau'n cael eu cymryd yn eich erbyn. Dim ond os ydych chi'n dewis cadw'r arf y byddwch chi’n mentro cael eich erlyn.