Ystafell gyswllt a rheoli'r llu

Rydym yn croesawu ceisiadau gan bobl o bob cefndir, diwylliant, crefydd, oedran, rhywedd a chyfeiriadedd rhywiol. Fodd bynnag, mae rhai amodau cymhwysedd y bydd angen i bob ymgeisydd eu bodloni, felly mae angen i chi wirio eich bod yn bodloni ein gofynion cyn cyflwyno cais.

• Mae angen i chi fod yn 16 oed neu’n hŷn i wneud cais.
• Dylai ymgeiswyr fod yn Ddinasyddion Prydeinig, neu fod â phasbort gwlad sy’n Aelod Wladwriaeth lawn o’r UE. Cewch hefyd wneud cais os ydych yn ddinesydd y Gymanwlad neu’n ddinesydd tramor sy’n byw yn y DU â chaniatâd amhenodol i aros.
• Mae’n rhaid eich bod wedi byw yn y DU am dair blynedd barhaus yn y cyfnod yn union cyn ymgeisio.
• Os oes gennych gofnod troseddol, nid yw hyn yn golygu eich bod yn anghymwys yn awtomatig. Mae’n dibynnu ar natur eich euogfarn. Datganwch unrhyw rybudd neu euogfarn a gawsoch ar eich ffurflen gais. Bydd peidio â gwneud hynny yn golygu eich bod yn methu’r broses archwilio oherwydd materion uniondeb.
• Os ydych yn cael trafferth gyda dyled, efallai y byddwch yn dal yn cael gwneud cais. Mae angen i chi roi tystiolaeth i ni o’ch gallu i reoli eich dyledion yn llwyddiannus. Fodd bynnag, os oes gennych unrhyw Ddyfarniadau Llys Sirol yn weddill neu os ydych yn fethdalwr heb ei ryddhau, rydych yn anghymwys yn awtomatig.
• Nid yw tatŵs sy’n sarhaus, yn ddi-chwaeth, yn amlwg neu’n niferus yn dderbyniol. Rhowch luniau a mesuriadau o unrhyw datŵs ynghyd â’ch cais.

Os byddwch yn llwyddiannus cewch eich cyflogi yn amodol ar gyfnod prawf o 16 mis. Y rheswm dros hyd y cyfnod prawf hwn yw ein bod yn treulio llawer o amser yn sicrhau eich bod yn derbyn yr holl hyfforddiant a chymorth angenrheidiol. Mae hyn yn rhoi digon o amser i chi ddysgu, magu hyder a dod yn gymwys ym mhob rhan o’r swydd.

Byddwch yn dechrau ar gyflog gradd 3 ac yn derbyn hyfforddiant Trin Galwadau i ddechrau. Mae'r chwe wythnos gyntaf yn seiliedig yn y dosbarth ac yn ystod wythnosau 7-13 byddwch yn gweithio 37 awr o ddydd Llun i ddydd Gwener yn cyflawni’r swydd a derbyn hyfforddiant a mentora ychwanegol gan gynnwys hyfforddiant Cofnodi a Rheoli Troseddau. Yn ystod y cyfnod hyfforddi hwn ni ellir caniatáu gwyliau blynyddol sylweddol oherwydd yr effaith ar gynnydd a phroblemau ail-drefnu oherwydd diffyg pobl. Tuag wythnos 14 eich cyflogaeth byddwch yn dechrau gweithio ar y patrwm sifftiau ac yn derbyn y lwfans sifft perthnasol. Mae hyn yn golygu y byddwch yn dechrau derbyn y taliadau 20% ychwanegol a gallwch hawlio taliadau ychwanegol ar gyfer penwythnosau (mae hyn yn cyfateb i ryw 14.28% arall).

Yna byddwch yn cael eich asesu o ran Cofnodi a Rheoli Troseddau ac unwaith i chi gymhwyso, byddwch yn symud i radd 4. Yn y diwedd byddwch yn symud i drydydd cam eich hyfforddiant sef y gwaith o anfon swyddogion. Pan fyddwch yn gwbl gymwys yn y maes hwn byddwch yn symud i radd 5. Bydd gofyn i chi hyfforddi a chynorthwyo aelodau eraill o staff gyda’u datblygiad pan fyddwch yn gwbl gymwys ym mhob maes.

O ystyried gofynion gweithredol, adnoddau a hyfforddiant ac o ystyried bod pobl yn cymhwyso ar adegau amrywiol, mae’n amhosibl gwarantu pryd yn ystod yr 16 mis y bydd y newid gradd hwn yn digwydd. Yr hyn y gellir ei warantu yw y byddwch ar radd pump ar y golofn gyflog erbyn diwedd yr 16 mis.

Mae’r system sifftiau’n golygu 6 diwrnod o weithio, 4 diwrnod o orffwys ac fel arweiniad mae’n gweithio fel hyn:

• dwy sifft diwrnod (0700- 1700/0900-1700/0700-1500)
• dwy sifft prynhawn/gyda’r nos (1100-2100 neu 1300-2100 neu 1700-0100)
• a dwy sifft gyda’r nos neu nos (1700-0300 neu 2100-0700).

Mae’r amserlen yn cael ei chyhoeddi o leiaf 3 mis ymlaen llaw. Mae’r system sifftiau’n weithredol 365 diwrnod y flwyddyn ac mae’n cynnwys Gwyliau Banc. Os byddwch yn gweithio ar y patrwm sifft llawn mae gennych chi hawl i lwfans sifft 20% a chyfradd uwch am weithio ar benwythnos. Yn ogystal â gwyliau blynyddol mae gan bob aelod o staff hawl i 8 Gŵyl Banc statudol y flwyddyn hefyd, a rhoddir y diwrnodau hyn i chi ond nid o reidrwydd ar ddyddiadau’r Gwyliau Banc. Os byddwch yn gweithio ar Ŵyl Banc bydd eich cyfradd yr awr yn uwch.

• I lwyddo ar y cam hwn, bydd angen i chi lenwi ffurflen gais cymhwysedd.
• Os byddwch yn pasio’r meini prawf cymhwyster sylfaenol, byddwn yn asesu’ch atebion i’r cwestiynau cymhwysedd (manylir yn y disgrifiad o’r swydd).
• Sylwer, os ydych yn gwneud cais am swydd ar radd 5 neu is (caiff hyn ei nodi yn yr hysbyseb), dim ond y meini prawf gofynnol y bydd gofyn i chi eu dangos (cyrhaeddiad, gwybodaeth a phrofiad fel arfer, er y caiff yr union fanylion eu cadarnhau ym mhroffil y swydd).
• Ceisiwch ateb y cwestiynau mor ofalus ac mor llawn ag y gallwch.
• Byddwch yn ymwybodol hefyd o’ch sillafu a’ch gramadeg.

Pan fyddwch chi wedi cwblhau’r holl wiriadau cyn cyflogi, byddwch yn symud i gam nesaf y broses.

Ar gyfer swyddi mewn lifrai, byddwch yn cael lle gyda’r garfan nesaf sydd ar gael ac yn cael apwyntiad i fesur a ffitio lifrai.

Caiff ein hamcanion cydraddoldeb ac amrywiaeth eu gorfodi drwy Fwrdd Cydraddoldeb ac Amrywiaeth sefydledig. Mae hyn yn dangos ein hymrwymiad i sicrhau ein bod bob amser yn trin ein cydweithwyr a’r cyhoedd â thegwch, urddas a pharch.

Darperir ein rhaglen cymorth i weithwyr gan CareFirst ac am ddim i bawb ac mae ar gael 24 awr y dydd drwy gydol y flwyddyn. Mae’r rhaglen yn darparu cymorth cyfrinachol ar gyfer problemau a all effeithio ar berfformiad, iechyd, a lles meddyliol ac emosiynol.

Mae gennym ni Uned Iechyd a Lles Galwedigaethol i’ch helpu i gynnal eich iechyd corfforol a seicolegol wrth weithio. Mae’r gwasanaeth yn gyfrinachol ac yn cynnwys gwasanaeth cwnsela.

Nod y tîm Iechyd Galwedigaethol yw cefnogi presenoldeb ac effeithiolrwydd drwy weithio’n rhagweithiol i leihau risgiau iechyd ac annog pobl i fod yn gyfrifol am eu hiechyd, eu ffitrwydd a’u lles eu hunain. Rydych chi hefyd yn gymwys i gael prawf llygaid am ddim.

Mae llawer o dimau chwaraeon i chi ymuno â nhw, gan gynnwys rhedeg, hoci, pysgota a phêl-droed. Mae cyfleusterau campfa am ddim hefyd mewn nifer o’n safleoedd.

Mae gennym ni bolisi absenoldeb mamolaeth alwedigaethol llawn ar gael i holl weithwyr Heddlu Gwent. Cyfanswm o 52 wythnos o amser mamolaeth: 18 wythnos ar gyflog llawn, 21 wythnos o dâl mamolaeth statudol, a 13 wythnos o ddim cyflog. Mae hyn yn amodol ar hyd gwasanaeth. Mae gennym ni hefyd bolisi absenoldeb ar gyfer mabwysiadu.

Mae amrywiaeth o gymdeithasau, rhwydweithiau a grwpiau sy’n cynorthwyo ein gweithlu ac mae gan Heddlu Gwent ystod o fentrau a chynlluniau i helpu cyd-weithwyr i ddatblygu.

Mae ein rhwydweithiau staff yn cynnig cymorth a chyfeillgarwch i’n swyddogion, y staff a’r gymuned leol. Maen nhw’n gweithio i gynorthwyo a chynghori cydweithwyr yn genedlaethol ac rydym yn falch o’r rhan weithredol sydd ganddyn nhw o ran dylanwadu ar blismona ledled y DU.

Mae’r rhwydweithiau a’r cymdeithasau yn cynnwys:

• Rhwydwaith Cymorth Anabledd
• Menywod Gwent ym Maes Plismona (GWiP)
• Cymdeithas Lleiafrifoedd Ethnig Gwent (GEMA)
• Rhwydwaith LHDT
• Cymdeithas Gristnogol yr Heddlu
• Grŵp Cymorth Iechyd Meddwl
• Chwaraeon yr Heddlu Gwent
• Cymdeithas Uwch-arolygwyr Heddlu Gwent
• Rhwydwaith Siaradwyr a Dysgwyr Cymraeg
• Unison a
• Ffederasiwn yr Heddlu.

Dim ond Swyddogion yr Heddlu all ymuno â Ffederasiwn yr Heddlu, os ydych chi’n penderfynu ymuno â Ffederasiwn yr Heddlu, gallwch ddewis ymuno â chynllun yswiriant bywyd a’r dyfarniadau yn daladwy i’ch priod neu’ch partner, ac i unrhyw ddibynyddion. Yn ogystal â gallu cael yswiriant salwch ac afiechyd hanfodol, gallwch gael yswiriant, ar gost ffafriol, i dalu am unrhyw dreuliau cyfreithiol sy’n gysylltiedig â’ch swydd, a gallwch hefyd ddefnyddio’r cyfleusterau adsefydlu gorau.

I hybu teithiau iachus i’r gwaith, mae Heddlu Gwent a Cycle Solutions wedi gweithio gyda’i gilydd i ddarparu cyfle i staff a swyddogion gael gostyngiad mawr oddi ar bris beic ac offer diogelwch, gan wasgaru’r gost dros 18 mis.

Gostyngiadau sefydliadol a ffordd o fyw gan gynnwys aelodaeth i gampfeydd (yn ogystal â champfeydd ar y safle), bwytai, prydau parod, teithio, cynhyrchion ariannol, cynllun gofal llygaid a mwy.

Gall cyflogeion ymuno â’r Cynllun Pensiwn Llywodraeth Leol, sy’n gynllun pensiwn  cyfrannol.

Ewch i Gynllun Pensiwn Gwent Fwyaf (Torfaen) am ragor o wybodaeth.

Mae Heddlu Gwent yn sylweddoli pwysigrwydd cydbwysedd rhwng bywyd a gwaith ac mae ganddo bolisïau da ar gyfer mamolaeth/tadolaeth, absenoldeb rhiant a rennir, amser i ofalu am y rhai sy’n dibynnu arnoch, gostyngiad gwirfoddol mewn oriau gwaith, yr hawl i wneud cais i weithio’n hyblyg ac i rannu swydd.

Yn dibynnu ar y swydd yr ydych yn gwneud cais amdani, bydd oriau gwaith amrywiol. Bydd rhai swyddi, fel y rhai yn ein Hystafell Gyfathrebu, er enghraifft, ar batrwm sifftiau sefydlog, tra bod gan lawer o swyddi swyddfa (hyd at swyddi prif swyddogion) y fantais o weithio oriau hyblyg a gweithio ystwyth.

Mae hyblygrwydd yn dibynnu ar y swydd.