Mae ugain yn ddigon - Heddlu Gwent yn ymuno ag ymgyrch diogelwch ar y ffyrdd cenedlaethol

Yr wythnos hon lansiodd GanBwyll ei ymgyrch 20mya cenedlaethol, sy'n ceisio gwella diogelwch plant a rhieni y tu allan i ysgolion cynradd.

Mae mwy o blant a rhieni'n dewis bod yn ecogyfeillgar a cherdded i'r ysgol ac adref, ac mae Heddlu Gwent yn gofyn yn daer ar yrwyr i gadw at y terfyn cyflymder a thalu sylw i beryglon posibl.

Dywedodd Prif Arolygydd Martyn Smith: "Mae'r terfyn cyflymder 20mya, sydd y tu allan i'r rhan fwyaf o ysgolion cynradd yng Nghymru, yno am reswm: i gadw plant a rhieni'n ddiogel wrth iddynt gerdded i'r ysgol ac adref.

"Rydym wedi ymroi i wella diogelwch ar y ffyrdd yng Ngwent a sicrhau bod pobl sy'n cerdded i'r ysgol ac adref yn ddiogel.

"Mewn ardaloedd lle mae defnyddwyr ffyrdd agored i niwed, fel plant a seiclwyr, i'w gweld yn aml, bydd arwyddion yn dangos bod terfyn 20mya yn weithredol. 

"Hoffem annog gyrwyr i edrych am fesurau eraill i arafu traffig hefyd, fel twmpathau cyflymder a rhwystrau igam-ogamu, sy'n dangos bod angen i chi arafu."

Dywedodd Teresa Ciano, Rheolwr Partneriaeth GanBwyll:

Mae gan ein Hymgyrch 20mya y tu allan i ysgolion cynradd ledled Cymru un nod allweddol, sef annog cydymffurfiaeth â'r terfyn cyflymder i gadw plant a rhieni'n ddiogel wrth iddynt gerdded i'r ysgol ac adref ar ddiwedd y dydd.

"Gobeithiwn weld y rhan fwyaf o ddefnyddwyr y ffordd yn cydymffurfio â'r terfyn cyflymder, gan chwarae eu rhan i gadw'r defnyddwyr ffyrdd hyn sy'n agored i niwed yn ddiogel er mwyn galluogi mwy o deuluoedd i gerdded neu feicio'n ddiogel ac yn hyderus i'r ysgol.

Os gwelwch ein faniau gorfodi y tu allan i'ch ysgol gynradd leol dros yr wythnos yma, rydym yna i wneud y siwrne i’r ysgol ac adref ar ddiwedd y dydd yn fwy diogel."

Prif nod Heddlu Gwent a GanBwyll yw gwneud ffyrdd yn fwy diogel a lleihau anafiadau a marwolaethau ar ffyrdd Cymru.

Rydym yn gorfodi'r rheolau yn y lle iawn, ar yr adeg iawn, am y rheswm iawn ac yn ceisio annog pobl i gydymffurfio â therfynau cyflymder.

Wrth i chi deithio heibio ysgolion cynradd yn ystod yr wythnos nesaf, sicrhewch eich bod yn gwirio eich cyflymder ac yn gwneud dewis diogel trwy gadw at y terfyn cyflymder.

Trwy wneud hynny byddwch yn chwarae eich rhan yn cadw ffyrdd Gwent yn ddiogel i bawb.