‘Peidiwch â pheryglu eich hun a phobl eraill trwy gael parti yn y tŷ.’

‘Peidiwch â pheryglu eich hun a phobl eraill trwy gael parti yn y tŷ.’

Mae Prif Uwch-arolygydd Mark Hobrough yn gofyn yn daer ar gymunedau Gwent i helpu i atal lledaeniad Coronafeirws.

Y penwythnos diwethaf, cafodd 54 o bobl eu dirwyo am dorri rheolau Covid-19, rhai ohonynt am gael partïon mewn tai.

Aeth swyddogion i bartïon mewn tai ym Mhont-y-pŵl, Casnewydd a Rhymni, Caerffili’r penwythnos diwethaf.

Dywedodd Prif Uwch-arolygydd Mark Hobrough: “Mae cyfyngiadau lefel rhybudd pedwar yn dal mewn grym yng Nghymru, sy’n golygu y dylai pobl aros yn eu cartrefi eu hunain a pheidio â theithio oni bai bod hynny’n angenrheidiol. Mae cynnal partïon mewn tai a chymysgu ag aelwydydd eraill, dan do ac yn yr awyr agored, wedi’i wahardd gan reolau Llywodraeth Cymru.

“Mae trefnu partïon ac ymgasglu â phobl eraill yn beryglus, yn hunanol ac yn gwbl annerbyniol yng ngoleuni’r bygythiad rydym yn ei wynebu ar hyn o bryd. Peidiwch â pheryglu bywydau eich anwyliaid a’r gymuned ehangach trwy gael partïon mewn tai neu drwy ymgasglu â phobl eraill.

“Hoffem ddiolch i fwyafrif trigolion Gwent sy’n cadw at reolau Covid a byddwn yn parhau i ymgysylltu, esbonio ac annog ein cymunedau i gydweithio â ni er mwyn cadw pawb yn ddiogel.

“Byddwn yn cymryd camau gweithredu yn erbyn pobl sy’n torri’r cyfyngiadau hyn yn ddi-hid.  Mae lefelau Coronafeirws yn dal yn uchel yn llawer o ardaloedd Gwent a, thrwy ddilyn cyngor Llywodraeth Cymru, mae pob un ohonom yn achub bywydau ac yn amddiffyn y GIG.”