Heddlu Gwent yn diolch i gymunedau am eu cefnogaeth dros gyfnod y Nadolig a'r Flwyddyn Newydd

Yn dilyn cyfnod prysur dros y Nadolig a'r Flwyddyn Newydd, mae Dirprwy Brif Gwnstabl Amanda Blakeman yn diolch i gymunedau am gefnogi ein swyddogion a oedd yn gweithio yn ystod y gwyliau ac am ddilyn cyfyngiadau Llywodraeth Cymru.

Dywed Dirprwy Brif Gwnstabl Amanda Blakeman:

"Yn draddodiadol, cyfnod y Nadolig a'r Flwyddyn Newydd yw'r amser prysuraf i wasanaethau brys, gyda mwy o alwadau i'n hystafell reoli nac ar unrhyw adeg arall o'r flwyddyn.

“Eleni gwnaethom dderbyn dros 4,500 o alwadau gan y cyhoedd sy'n gyson â'r flwyddyn flaenorol.   

“Bu'n rhaid i lawer o bobl newid eu cynlluniau yn sgil y pandemig. Cawsom ffurfio swigen Nadolig am un diwrnod cyn dychwelyd at gyfyngiadau mwy llym ar ôl Dydd Nadolig.

"Hoffwn ddiolch i'r mwyafrif o bobl a barchodd y sefyllfa mae pawb ohonom ynddi ac a helpodd ein cymunedau i arafu lledaeniad y feirws.

Rhwng 19 Rhagfyr 2020 a 4 Ionawr 2021 cyflwynodd Heddlu Gwent bron i 60 o hysbysiadau cosb benodedig.

Cymerwyd camau gorfodi yn erbyn unigolion a fu’n haerllug ac a aeth yn groes i'r cyfyngiadau presennol. Roedd y canlynol ymysg rhai o'r esgusodion a roddwyd:

• Dod i Gymru i weld yr eira
• Mynd am dro yn y car i Fryste ar ôl cyfnod o hunan ynysu
• Teithio i Walsall i gael gwers bocsio
• Mynd i bartïon mewn tai

“Roedd galw mawr ar swyddogion oherwydd bod pobl yn mynd i bartïon mewn tai a chyflwynwyd 28 hysbysiad cosb benodedig yn ystod yr un cyfnod.

"Mae'n bwysig bod pawb yn deall y sefyllfa yng Nghymru. Rhaid i bob un ohonom chwarae ein rhan yn gwrthsefyll yr argyfwng iechyd.

"Bydd swyddogion yn parhau i ymgysylltu ag unigolion a'u hannog nhw i ddilyn y canllawiau. Byddwn yn cymryd camau gorfodi yn erbyn y rhai sy'n parhau i fynd yn groes iddynt.

"Mae'r lefel rhybudd presennol yn gofyn bod pawb yn ystyried eu cynlluniau teithio, yn aros yn lleol ac yn peidio â gadael cartref oni bai bod hynny'n hanfodol."

“Hoffwn ddiolch i holl weithwyr y gwasanaethau brys ac aelodau'r cyhoedd sydd wedi gwneud popeth o fewn eu gallu i gadw Gwent yn ddiogel.”