Heddlu Gwent yn recriwtio prentisiaid staff yr heddlu newydd

Fel un o brif gyflogwyr y rhanbarth, penderfynodd Heddlu Gwent yn ddiweddar ei fod am gyflogi prentisiaid staff yr heddlu ar gyfer nifer o swyddi a disgyblaethau.

Derbyniwyd dros 100 o geisiadau ac yn dilyn proses gyfweld gystadleuol dewiswyd 15 unigolyn ysbrydoledig i ymuno â’r teulu plismona.

Cyn i’r staff heddlu newydd ddechrau yn eu swyddi, dywedodd Dirprwy Brif Gwnstabl Amanda Blakeman:

“Mae Heddlu Gwent wedi ymroi i roi cyfleoedd i bobl yn ein cymunedau lleol gael gwaith.

“Mae’n bwysig bod plismona’n cynnwys unigolion sydd â phrofiad bywyd, ond mae pobl gyda syniadau newydd ac ysbrydoledig yn bwysig hefyd.

 “Rwyf wrth fy modd i weld cymysgedd mor amrywiol a chynhwysol o brentisiaid staff yr heddlu.

“Trwy ymuno â’n teulu heddlu, bydd y prentisiaid yn profi amrywiaeth eang o gyfleoedd ac yn dysgu sgiliau a fydd yn eu helpu nhw wrth i’w gyrfa ddatblygu.”

Roedd prentisiaethau staff yr heddlu ar gael mewn meysydd fel gweinyddu busnes, gwasanaeth cyhoeddus, y maes digidol ac adnoddau. Dros gyfnod o 22 mis bydd y prentisiaid yn dysgu sgiliau newydd, cael cipolwg go iawn ar blismona a chanfod beth sydd ei angen er mwyn cadw cymunedau’n ddiogel.

Bydd y garfan gyntaf o brentisiaid yn gweithio i ennill achrediad ffurfiol yn rhan o Dystysgrifau Prentisiaeth Cymru.

Meddai Jeff Cuthbert, Comisiynydd yr Heddlu a Throsedd:

“Mae’n wych gweld arweinwyr newydd ac ysbrydoledig y dyfodol yn ymuno â Heddlu Gwent. 

"Mae’r prentisiaethau staff yr heddlu newydd hyn yn cynrychioli’r camau sy’n cael eu cymryd i gyflwyno syniadau newydd i’r maes plismona. 

“Mae plismona’n yrfa wych a heriol, lle mae unrhyw un sy’n frwd dros gyfrannu er mwyn pobl mewn angen yn gallu gwneud gwahaniaeth cadarnhaol go iawn. 

“Rwyf yn gweld mwy o wynebau newydd nag erioed yn ymuno â’r heddlu, o amrywiaeth eang o oedrannau, cefndiroedd a phrofiad. 

“Dymunaf bob hwyl i’r recriwtiaid newydd hyn yn eu swyddi newydd.”