Dau wedi'u harestio wrth i Heddlu Gwent ymateb i ymddygiad gwrthgymdeithasol yng Nghoed-duon
Cynnwys y prif erthygl
Rhoddwyd gorchymyn gwasgaru ar waith nos Wener (14 Ionawr) i helpu i fynd i'r afael ag ymddygiad gwrthgymdeithasol yn yr ardal.
Cynhaliwyd mwy o batrolau trwy gydol y penwythnos wrth i dîm plismona cymdogaeth Caerffili gymryd camau cadarn yn erbyn y bobl oedd yn creu aflonyddwch, dychryn neu ofid.
Rhoddodd y gorchymyn bwerau ychwanegol i swyddogion anfon grwpiau o'r ardal os oedd eu hymddygiad yn debygol o gyfrannu at anhrefn yn y gymuned.
Arweiniodd y pwerau ychwanegol a roddwyd i swyddogion at ddau arést.
Arestiwyd bachgen 17 oed ar amheuaeth o gyflawni trosedd yn erbyn y drefn gyhoeddus ac arestiwyd menyw 40 oed ar amheuaeth o dorri hysbysiad gwarchod y gymuned.
Cyhoeddodd swyddogion dri hysbysiad am droseddau traffig ffyrdd hefyd am droseddau'n cynnwys gyrru heb yswiriant, saith hysbysiad gwasgaru, a gwnaethant gynnal chwe achos o stopio a chwilio (yr arweiniodd un ohonynt at atafaelu cyffuriau rheoledig).
Meddai Arolygydd Cymdogaeth Canol Caerffili, Andrew Boucher:
"Rydym wedi ymroi i fynd i'r afael ag ymddygiad gwrthgymdeithasol ac unrhyw ymddygiad sy'n cael effaith negyddol ar ansawdd bywyd trigolion yn yr ardal.
"Yn ystod yr ymgyrch ar y penwythnos, gwnaethom gyhoeddi gorchymyn gwasgaru a defnyddio swyddogion ychwanegol i roi sylw i'r cynnydd diweddar mewn hysbysiadau am ymddygiad gwrthgymdeithasol.
"Rydym yn parhau i weithio gyda phartneriaid - gan gynnwys Cyngor Bwrdeistref Sirol Caerffili, ysgolion lleol a'r Gwasanaeth Troseddau Ieuenctid - i sicrhau ein bod yn mynd i'r afael â'r broblem o bob cyfeiriad."