Ymchwiliad heddlu i adroddiad o ymosodiad yn ysgol Abertyleri

Rydyn ni’n ymchwilio i adroddiad am ymosodiad ar fachgen 11 oed mewn ysgol yn Abertyleri ddydd Mawrth 17 Mai.

Meddai Uwch-arolygydd Vicki Townsend:

“Mae ein swyddogion yn cadw cysylltiad agos ac yn rhoi cymorth i deulu’r bachgen ifanc. Pan oedd yn gadael tir yr ysgol ar ôl yr ymosodiad derbyniodd anaf difrifol i’w law, a gafodd ei dal mewn ffens.

“Ers i ni dderbyn yr adroddiad hwn, ddydd Mercher 18 Mai, mae’r digwyddiad wedi ennyn llawer o ddiddordeb a sylw. Gofynnaf yn daer ar bobl i feddwl am yr effaith y gallai eu negeseuon a sylwadau ar gyfryngau cymdeithasol ei chael ar y bobl sydd wedi’u heffeithio, wrth i ymchwiliad yr heddlu barhau.

“Rydyn ni’n gweithio’n agos gyda’r ysgol ac mae swyddogion yn dal i wneud ymholiadau yn yr ardal.”

Gall unrhyw un ag unrhyw wybodaeth a allai helpu ymchwiliad yr heddlu ein ffonio ni ar 101, gan grybwyll 2200165495, neu anfon neges uniongyrchol aton ni.