Cefnogi’r rhai sy'n byw â dementia i fyw yn annibynnol
Cynnwys y prif erthygl
Heddlu Gwent yw'r heddlu cyntaf yng Nghymru i fabwysiadu cynllun sy'n rhoi'r cymorth sydd ei angen ar y bobl hynny sy'n byw â dementia.
Mae cynllun newydd sy'n cael ei redeg rhwng Heddlu Gwent, Bwrdd Iechyd Prifysgol Aneurin Bevan, Bwrdd Partneriaeth Rhanbarthol Gwent a Chymdeithas Alzheimer Cymru wedi’i lansio ledled Gwent. Mae'r cynllun band arddwrn dementia yn golygu y gall gweithwyr gwasanaethau brys adnabod a chael y cymorth a'r gefnogaeth gywir yn hawdd i'r rhai sy'n byw â'r cyflwr.
Fel rhan o gynllun treialu, bydd dros 80 o drigolion lleol yn cael cynnig y band a fydd yn cysylltu darparwyr gofal â gweithwyr gwasanaethau brys.
Cyn y lansiad, dywedodd y Prif Arolygydd Stephanie Blakemore:
“Mae byw â dementia yn aml yn frawychus ac yn eich gadael chi'n teimlo'n unig.
“Pan fydd angen cymorth ar rywun â dementia gan ymarferwyr y gwasanaethau brys, mae angen llawer iawn o waith i gasglu'r holl wybodaeth i ofalu am y person hwnnw'n gywir.
“Mae'r band arddwrn yn rhoi gwybod yn weledol i'r cyhoedd, gweithwyr y gwasanaeth brys a darparwyr gofal eraill fod yr unigolyn yn byw â dementia.”
Mae'r cynllun hwn yn ategu Protocol Herbert y mae Heddlu Gwent yn ei gefnogi ochr yn ochr â heddluoedd eraill Cymru. Mae'r cynllun yn darparu gwybodaeth werthfawr am unrhyw un sy'n byw â dementia a chyflyrau niwrolegol eraill.
Mae'r protocol yn rhoi gwybodaeth i weithwyr y gwasanaethau brys am feddyginiaeth, gwybodaeth gyswllt, lleoedd yr ymwelir â nhw'n aml a ffotograff diweddar.
Dywedodd y Cynghorydd Paul Cockeram, Cadeirydd Bwrdd Partneriaeth Rhanbarthol Gwent:
“Os bydd rhywun yn mynd ar goll neu'n drysu pan fydd allan yn y gymuned, gall fod yn brofiad hynod o ofidus i'r sawl sy'n byw â dementia, ei deulu a'i ofalwyr.
“Mae Bwrdd Partneriaeth Rhanbarthol Gwent yn falch o gefnogi Heddlu Gwent a phartneriaid i fod yr ardal gyntaf yng Nghymru i dreialu'r dechnoleg hon.
“Bydd y bandiau arddwrn yn cynnwys gwybodaeth hanfodol, gan gynnwys enw'r sawl sy’n eu gwisgo a manylion perthynas agosaf, y gall aelodau'r gymuned eu casglu drwy ap ar eu ffôn os byddant yn dod o hyd i bobl y mae angen cymorth a chefnogaeth arnyn nhw.
“Nid yw'r dechnoleg hon yn disodli gofal da, ond bydd yn gweithredu fel haen ychwanegol o ddiogelwch ochr yn ochr â Phrotocol Herbert, i helpu i gadw pobl yn ddiogel, wrth i bobl barhau i wneud yr hyn sy'n bwysig iddynt i fyw yn dda”.
I gael rhagor o wybodaeth, ewch i https://www.gwent.police.uk/cy-GB/notices/af/protocol-herbert/ neu anfonwch e-bost i [email protected]