Ymgyrch lwyddiannus yn targedu gyrru gwrthgymdeithasol ledled Casnewydd a Sir Fynwy

Mae ein Huned Plismona Ffyrdd a Gweithrediadau Arbenigol wedi ymuno â thimau plismona cymdogaeth i roi sylw i yrru gwrthgymdeithasol o gwmpas Casnewydd a Sir Fynwy.

Cynhaliwyd Ymgyrch Drift ddydd Sul 23 Hydref gyda'r nod o fynd i'r afael ag achosion o geir yn ymgynnull a gyrru gwrthgymdeithasol yn ne Sir Fynwy a dwyrain Casnewydd.

Cynhaliodd ein timau wiriadau gorfodi rheolau cyflymder yng Ngwndy, Rogiet, Cil-y-coed, ffordd gyswllt Dyffryn Gwy, Cas-gwent, A48, M4 a'r A4810 rhwng Spytty a Magwyr.

Dyma'r hyn a ddigwyddodd yn ystod y dydd:

• 21 hysbysiad trosedd traffig wedi'u cyflwyno, gan gynnwys hysbysiadau am oryrru, llwythi anniogel, cerbydau tebygol o achosi anaf, teiars diffygiol a rhifau plât anghyfreithlon.
• Tri gwaharddiad cerbyd am lwythi anniogel, cordiau teiars yn y golwg a'r cerbyd mewn cyflwr peryglus.
• Dau yrrwr wedi cael gwŷs i ymddangos yn y llys am yrru heb ofal dyledus
• Dau o bobl wedi'u harestio am droseddau gyrru dan ddylanwad cyffuriau
• Un cerbyd wedi'i atafaelu am ddiffyg yswiriant
• Pedwar cerbyd wedi'u hatafaelu am yrru gwrthgymdeithasol.

Mae hyn yn ychwanegol at y 40 hysbysiad trosedd traffig a gyhoeddwyd ddydd Mercher 19 Hydref am oryrru ar yr A4810.

Byddwn yn ceisio cynnal gweithgareddau tebyg yn ystod yr wythnosau nesaf i dargedu gyrru gwrthgymdeithasol.

Meddai Cwnstabl Heddlu Sean Fletcher:

"Mae gan bob un ohonom ran i'w chwarae i sicrhau diogelwch pobl eraill sy'n defnyddio'r ffyrdd, a cherddwyr. Mae hynny'n golygu gyrru'n ofalus ac yn gyfrifol. 

“Mae pobl sy'n dewis torri'r gyfraith ar ein ffyrdd nid yn unig yn peri risg iddyn nhw eu hunain ond i bobl eraill hefyd.

“Rydym wedi ymroi i wella diogelwch ar y ffyrdd i bawb sy'n defnyddio'r ffyrdd yng Ngwent ac mae Ymgyrch Drift yn un o'r ffyrdd rydym yn mynd i'r afael â'r troseddau moduro hyn.

"Rwyf yn gobeithio y bydd canlyniadau'r ymgyrch hwn yn anfon neges glir bod gyrru'n anghyfrifol yn annerbyniol ac y byddwn yn ymdrin yn gadarn â phobl sy'n gwneud hynny.”