Dyn o Lynebwy yn cael carchar am droseddau rhywiol

Cafodd Joel Gillard, 30, ei ddedfrydu i naw mlynedd ac wyth mis yn y carchar ar ôl ei gael yn euog yn Llys y Goron Caerdydd.

Mae dyn o Lynebwy wedi cael dedfryd o naw mlynedd ac wyth mis yn y carchar ar ôl ei gael yn euog yn y llys.

Ymddangosodd Joel Gillard, 30, yn Llys y Goron Caerdydd ddydd Mawrth 8 Awst lle plediodd yn euog i 12 o droseddau rhywiol, gan gynnwys:

• dau gownt o achosi neu ysgogi plentyn o dan 16 oed i gymryd rhan mewn gweithgaredd rhywiol
• pedwar cownt o achosi neu ysgogi plentyn o dan 13 oed i gymryd rhan mewn gweithgaredd rhywiol
• cyfathrebu rhywiol gyda phlentyn o dan 16 oed
• achosi plentyn i wylio gweithred rywiol
• tri chownt o greu delweddau anweddus o blant
• meddu ar ddelweddau pornograffig eithafol.

Pan gafodd ei arestio, roedd gan Gillard 602 o ddelweddau anweddus o blant yn amrywio o gategori A i gategori C.

Dywedodd y swyddog yn yr achos, Ditectif Gwnstabl Samantha Davies:

"Gwnaeth Gillard esgus bod yn fachgen yn ei arddegau ar-lein a’i unig ddiben oedd targedu plant agored i niwed, meithrin perthynas amhriodol â nhw a chamfanteisio arnyn nhw i gyflawni gweithredoedd er ei foddhad rhywiol ei hun.

"Nid oedd yn adnabod ei ddioddefwyr, ac ni wnaeth ef gyfarfod â nhw, ond defnyddiodd y cyfryngau cymdeithasol i ddod o hyd i blant ledled y wlad y byddai’n eu cam-drin yn ddiweddarach.

“Heb dystiolaeth ddewr dioddefwyr Gillard, ni fydden ni wedi gallu dod ag ef gerbron y llysoedd i wynebu cyfiawnder am ei weithredoedd. Maen nhw wedi dangos dewrder aruthrol, cadernid, a chryfder trwy gydol yr ymchwiliad a’r broses llys, gan gynnwys rhoi tystiolaeth hanfodol yn y llys.

"Mae Gillard yn ddyn peryglus, ac mae’n berygl gwirioneddol i blant a phobl ifanc.

"Mae ein tîm ymchwilio ar-lein yr heddlu wedi ymrwymo i ymdrin â throseddau wedi’u galluogi’n ddigidol, drwy nodi a thargedu troseddwyr a gweithio gydag asiantaethau partner i ddiogelu’r rhai sy’n wynebu risg.

"Mae’r ddedfryd a gafodd ei rhoi gan y llys yn dangos pa mor werthfawr yw’r gwaith y maen nhw’n ei wneud i gadw pobl ifanc yn ddiogel ar-lein.

"Rydyn ni hefyd yn gobeithio y bydd y canlyniad hwn yn dangos i ddioddefwyr eraill y bydd rhywun yn gwrando arnyn nhw, yn eu credu ac yn eu parchu. Rydyn ni’n cymryd pob honiad o’r math hwn o ddifrif ac os caiff adroddiad ei wneud i ni, rydyn ni’n ymchwilio’n drylwyr i’r mater.

"Rydyn ni eisiau tawelu meddwl unrhyw un sy’n ystyried gwneud hynny bod amrywiaeth eang o gefnogaeth ar gael; nid yn unig gan Heddlu Gwent ond gan asiantaethau partner a all eich helpu drwy’r broses gyfan.

"Hoffen ni atgoffa rhieni a gofalwyr i fod yn wyliadwrus o weithgareddau ar-lein eu plant ac i gael sgyrsiau agored ynghylch peryglon siarad â dieithriaid ar-lein. Ein cyngor ni yw, peidiwch byth â rhannu gwybodaeth bersonol, gan gynnwys ffotograffau ar-lein."

Cafodd Gillard ei ddedfrydu i naw mlynedd ac wyth mis yn y carchar a bydd yn parhau ar y gofrestr troseddwyr rhyw am gyfnod amhenodol.

Cafodd hefyd ei wneud yn destun Gorchymyn Atal Niwed Rhywiol (SHPO) am y 25 mlynedd nesaf.