Yr ymgyrch diweddaraf i fynd i’r afael â throseddau moduro
Cynnwys y prif erthygl
Yn rhan o'r ymgyrch diweddaraf i fynd i’r afael â throseddau moduro, gwiriodd swyddogion nifer o gerbydau ac o ganlyniad arestiwyd dau ddyn ac atafaelwyd un cerbyd.
Nod Ymgyrch Utah - diwrnod o weithredu amlasiantaeth - yw mynd i'r afael â defnyddwyr y ffyrdd sy'n rhoi modurwyr eraill mewn perygl, naill ai drwy yrru'n anghyfreithlon neu drwy yrru cerbydau nad ydynt yn bodloni safonau diogelwch.
Cynhaliwyd yr ymgyrch diogelwch ar y ffyrdd ddydd Mawrth 27 Mehefin yn safle profi a phont bwyso'r Asiantaeth Safonau Cerbydau (DVSA) ar gylchfan Coldra, Casnewydd.
Ymunodd swyddogion o'r uned plismona ffyrdd gyda phartneriaid o'r DVSA a GanBwyll.
Yn ystod y diwrnod, dyma a gyflawnwyd:
- Arestiwyd un dyn ar amheuaeth o yrru dan ddylanwad cyffuriau - arestiwyd dyn arall ar amheuaeth o reolaeth drwy orfodaeth mewn cysylltiad â digwyddiad ar wahân.
- Cyflwynwyd naw hysbysiad trosedd traffig - dau am beidio â gwisgo gwregys, un am ddefnyddio ffôn symudol wrth y llyw, dau am blatiau rhif anghyfreithlon a phedwar am deiars moel/wedi'u difrodi.
- Atafaelwyd un cerbydam yrru gwrthgymdeithasol.
- Cofnododd GanBwyll 24 modurwr yn gyrru dros y terfyn cyflymder
- Cyflwynodd y DVSA waharddiadau i 27 gyrrwr am nad oedd eu cerbydau'n addas ar gyfer y ffordd fawr
- Derbyniodd chwe gyrrwr HGV waharddiadau oriau gyrwyr
- Gwaharddwyd un cerbyd HGV am ddiffyg trwydded gweithredu a derbyniodd un arall waharddiad am ddiffyg tacograff
- Gwaharddwyd un cerbyd am fod yn rhy drwm.
Meddai Cwnstabl Heddlu Solomon Lowe:
“Rydym wedi ymroi i wella diogelwch ar y ffyrdd i bawb sy'n defnyddio'r ffyrdd yng Ngwent ac mae Ymgyrch Utah yn un o'r ffyrdd rydym yn mynd i'r afael â throseddau moduro. Rwy'n gobeithio y bydd canlyniadau'r ymgyrch yma'n anfon neges glir bod gyrru'n fraint a bod pobl sydd ddim yn cadw eu cerbyd mewn cyflwr da neu sy'n gyrru'n anghyfrifol yn annerbyniol a byddwn yn delio'n gadarn gyda nhw.
“Rwyf eisiau diolch i'n partneriaid am weithio gyda ni ar yr ymgyrch yma i wneud y ffyrdd yn ein cymunedau mor ddiogel â phosibl.
“Mae gan bob un ohonom ni ran i'w chwarae i sicrhau diogelwch pobl eraill sy'n defnyddio'r ffyrdd - gofynnaf i bob modurwr yrru'n ofalus, yn gyfrifol ac o fewn cyfyngiadau'r gyfraith, ac i sicrhau bod eu cerbydau mewn cyflwr da bob amser.”