Blog Dangos y Drws i Drosedd: Chwefror i Mawrth 2023
Cynnwys y prif erthygl
Croeso i'r pedwerydd rhifyn o'n blog troseddau meddiangar.
Yn y rhifyn hwn o'n blog Dangos y Drws i Drosedd (DyDiD) misol, byddwn yn edrych ar y gwaith mae ein timau troseddau meddiangar wedi bod yn ei wneud ledled Gwent.
Mae ein tîm DyDiD yn cynnwys swyddogion a staff ar draws Gwent, ac maen nhw'n gwneud gwaith ochr yn ochr â'n swyddogion troseddau cefn gwlad, yn ogystal â Chyfoeth Naturiol Cymru.
Dyma’r hyn a gyflawnodd y tîm ym mis Chwefror:
- marcio 18 beic yn fforensig
- adolygu 1,383 achos o droseddau meddiangar
- dosbarthu 139 pecyn atal trosedd ledled Gwent
- anfon 53 o rybuddion am eiddo wedi'i ddwyn at werthwyr ail law a delwyr sgrap.
Rhoddodd hyfforddwyr bregusrwydd ac ecsbloetiaeth y tîm hyfforddiant i 113 o bobl ar sut i adnabod arwyddion ecsbloetio.
Ym mis Chwefror bu gostyngiadau yn y grwpiau troseddau meddiangar hefyd, megis dwyn a byrgleriaeth breswyl.
Bu gostyngiad 23% mewn byrgleriaeth breswyl o gymharu â mis Ionawr, a gostyngiad 24% o gymharu â'r cyfartaledd misol yn 2021 a 2022.
Dywedodd Arolygydd Carl Morgan:
"Mae'r gwaith mae'r tîm yn ei wneud bob dydd mor bwysig yn helpu i gadw preswylwyr a busnesau ledled Gwent yn ddiogel.
"Drwy weithio gydag adrannau eraill yr heddlu ac asiantaethau partner, mae'r tîm yn gallu cynnal digwyddiadau a sesiynau sy'n eu helpu nhw i hysbysu'r cyhoedd am droseddau meddiangar a darparu cyngor ar atal trosedd.
"Mae 2023 wedi dechrau'n wych, ac rwy'n edrych ymlaen at rannu mwy o'r gwaith pwysig y mae'r tîm yma’n ei wneud drwy gydol y flwyddyn."
Edrychwch sut mae'r tîm wedi cyflawni'r canlyniadau hyn...
Trefnodd y tîm ddigwyddiadau marcio beiciau yng Nghasnewydd a Glynebwy, lle cafodd 18 beic eu marcio'n defnyddio Bike Register.
Trwy gofrestru ar gyfer Bike Register a marcio eich beic, rydych chi'n fwy tebygol o gael eich beic wedi ei ddychwelyd atoch chi os bydd yn cael ei ddwyn.
Aeth y tîm DyDiD a’r tîm troseddau cefn gwlad i gynhadledd troseddau solar DeterTech yn Telford. Cawsant gyfle i drafod y broblem o droseddau ar ffermydd solar gydag arweinwyr y diwydiant, a dysgu tactegau a datrysiadau atal trosedd newydd a oedd yn benodol ar gyfer y diwydiant pŵer solar.
Helpodd y gynhadledd y ddau dîm i greu partneriaethau gwaith a chysylltiadau newydd ar gyfer ffermydd solar yng Ngwent, a fydd yn galluogi staff i greu map o'r holl safleoedd ffermydd solar ar draws Gwent.
Cwblhaodd swyddogion busnes DyDiD a'n tîm troseddau cefn gwlad gwrs tri diwrnod ar archwilio cerbydau wedi'u dwyn. Ar y cwrs, gwnaethant ddysgu sut i adnabod cerbydau wedi'u dwyn, gan gynnwys cerbydau amaethyddol a pheiriannau mawr.
Mae'r sgiliau arbenigol ychwanegol hyn yn hanfodol er mwyn i swyddogion allu cyflawni eu swyddi.
Troseddau cefn gwlad
Mae'r tîm troseddau cefn gwlad wedi cael mis prysur hefyd.
Dyma rai o’r achosion y gwnaethant ymdrin â nhw yn ystod y mis:
- 146 galwad am feicio oddi ar y ffordd
- 40 galwad am dda byw
- dau ymosodiad ar dda byw
- dau dân glaswellt bwriadol
- un drosedd treftadaeth.
Ein partneriaid, digwyddiadau, a’r gymuned
Mae ein tîm yn parhau i weithio gyda'r gymuned a’n partneriaid i amddiffyn y cyhoedd a busnesau.
Maen nhw’n gweithio i adnabod tueddiadau troseddu, sicrhau bod gwaith ataliol yn cael ei wneud, cefnogi dioddefwyr trosedd ac adnabod y rhai sy'n cyflawni troseddau yn ein cymunedau.
I gael mwy o wybodaeth am y digwyddiadau sydd ar y gweill ac i weld ble maen nhw’n cael eu cynnal yn y gymuned, dilynwch y tîm ar Twitter neu ewch i'w tudalen ar ein gwefan.
Os hoffech chi gael mwy o wybodaeth am sut gall y tîm eich helpu chi, anfonwch e-bost at [email protected].
Os ydych chi’n dyst i drosedd, ffoniwch 101, defnyddiwch ein system riportio ar-lein, neu anfonwch neges atom ni ar Facebook a Twitter. Gallwch riportio wrth Crimestoppers hefyd yn gwbl ddienw - ar eu gwefan neu drwy ffonio 0800 555 111.
Mewn argyfwng, ffoniwch 999 bob tro.