Dyn wedi’i arestio a 360 o blanhigion canabis wedi’u hatafaelu yn Ystrad Mynach
Cynnwys y prif erthygl
Gweithredodd swyddogion warant mewn eiddo masnachol gwag ar Bedwlwyn Road dydd Sul 16 Mehefin.
Mae dyn 26 oed wedi cael ei arestio ar ôl i swyddogion ddarganfod ffatri canabis gyda mwy na 350 o blanhigion mewn eiddo masnachol gwag yn Ystrad Mynach.
Ynghyd â swyddogion o’r uned troseddau trefnedig difrifol, gweithredodd tîm plismona cymdogaeth gogledd Caerffili warant mewn eiddo ar Bedwlwyn Road, Ystrad Mynach, tua 4.10pm dydd Sul 16 Mehefin.
Yn yr adeilad dau lawr, daethant o hyd i ryw 361 o blanhigion canabis ar draws wyth ystafell.
Yn ystod y cyrch, datgymalodd swyddogion y ffatri ac atafaelu cyffuriau dosbarth B, cyfarpar cysyllt edig â chynhyrchu cyffuriau, a ffôn.
Meddai Rhingyll Tom Brookes:
“Ar ol chwilio’r adeilad, gwnaethom arestio dyn 26 oed ar amheuaeth o dyfu canabis. Mae yn y ddalfa ar hyn o bryd.
“Rydym wedi ymroi o hyd i weithredu yn sgil unrhyw wybodaeth mae’r cyhoedd yn gallu ei rhoi i ni am droseddau cyffuriau yn ein cymunedau, fel y mae’r gwarantau yma’n dangos.
“Hwn yw’r trydydd cnwd canabis sylweddol mae’r tîm wedi’i dadorchuddio dros y misoedd diwethaf yng ngogledd Caerffili ac rwy’n gobeithio ei bod yn anfon neges glir y byddwn yn parhau i gymryd camau pan fyddwn yn derbyn gwybodaeth, yn parhau i weithredu gwarantau, dwyn pobl gerbron y llysoedd a thynnu cyffuriau oddi ar ein strydoedd.
“Os oes gennych chi unrhyw wybodaeth am gyflenwi cyffuriau, hyd yn oed os nad ydych chi’n credu ei bod yn bwysig iawn, cysylltwch â ni. Mae cynhyrchu a chyflenwi cyffuriau’n gallu cael effeithiau pellgyrhaeddol ar ein cymunedau, a byddwn yn parhau i wneud ein gorau glas i amddiffyn pobl rhag niwed.”
Gofynnir i unrhyw un â gwybodaeth am droseddau cyffuriau yng Ngwent ffonio 101 neu anfon neges uniongyrchol atom ni ar Facebook neu X.
Gallwch ffonio Crimestoppers hefyd, yn ddienw, ar 0800 555 111.