Arestio pump ac atafaelu tri cherbyd mewn ymgyrch ym Mlaenau Gwent
Cynnwys y prif erthygl
Mae swyddogion ar draws tîm plismona cymdogaeth Blaenau Gwent wedi cynnal cyfres o ymgyrchoedd gyda’r nos i fynd i'r afael â throseddau cyllyll, troseddau cerbydau a dwyn tanwydd.
Mae cyfres o ymgyrchoedd gyda'r nos ar draws Abertyleri, Glynebwy, Tredegar a Llanhiledd wedi arwain at arestio pump o bobl, atafaelu tri cherbyd a rhywfaint o gyffuriau, a mwy.
Fel rhan o waith Gwent ar gyfer Sceptre – pwyslais Cyngor Cenedlaethol Prif Swyddogion yr Heddlu ar fynd i'r afael â throseddau cyllyll a thrais difrifol – bu swyddogion yn patrolio canol trefi Tredegar ac Abertyleri, yn ogystal â Phen-y-bryn yng Nglynebwy, i dargedu pobl sy’n cario cyllyll.
Hefyd, gwelodd Ymgyrch Greyhawk, a gynhaliwyd rhwng dydd Mawrth 14 Mai a dydd Gwener 17 Mai, y tîm yn targedu'r rhai sy'n cyflawni troseddau cerbydau yn y fwrdeistref.
Dywedodd y Prif Arolygydd Stevie Warden, a arweiniodd yr ymgyrchoedd:
“Rydym wedi gweld cynnydd yn ddiweddar mewn adroddiadau o ddwyn cerbydau a lladradau o gerbydau yn Llanhiledd, Abertyleri a Thredegar.
“Yr wythnos diwethaf, bu swyddogion o'n timau cymdogaeth a gorfodi yn gweithio gydag uned plismona ffyrdd a gweithrediadau arbenigol (RPSO), a swyddog ci heddlu, i gynnal chwiliadau i nodi’r rhai hynny a amheuir o ddwyn beiciau a cherbydau eraill, yn ogystal â thanwydd.
“Arweiniodd patrolau ar hyd ystadau diwydiannol yn Rassau a Brynmawr, yn ogystal â stopio rhagweithiol yn Abertyleri, Llanhiledd a Thredegar at swyddogion yn atafaelu dau gar ac un beic oddi ar y ffordd ac yn cyflwyno dau adroddiad am droseddau gyrru.”
Yn ystod un o'r chwiliadau hyn, cafodd dynes 37 oed o Dredegar ei harestio ar amheuaeth o fod â chyffur dosbarth A a reolir, yn cario offer i fynd ati i ddwyn a dwyn o siop a methu â darparu sbesimen.
Ychwanegodd y Prif Arolygydd Warden:
“Yn ystod yr ymgyrch, gwnaethom gynnal 27 chwiliadau stopio, gan ddod o hyd i gyffuriau dosbarth A a B a’u hatafaelu, ac arestio nifer o bobl ar amheuaeth o amrywiaeth o droseddau lladrad.
“Mae'r tîm wedi ymrwymo'n sicr i ddileu troseddau cerbydau ym Mlaenau Gwent a byddant yn parhau i gasglu gwybodaeth i lywio ymgyrchoedd manwl a rhagweithiol fel hyn.
“Byddwn yn parhau i weithredu ar unrhyw wybodaeth a roddir i nodi'r rhai sy'n gyfrifol am droseddau cerbydau, a'r rhai sy'n dwyn tanwydd, a'u dwyn gerbron llys.
“Gallwch ein helpu. Os oes gennych unrhyw bryderon ynghylch troseddau cyllyll, troseddau cerbyd neu ddelio cyffuriau yn eich cymuned, ac yn credu bod gennych wybodaeth a allai ein helpu i nodi y rhai sy'n gyfrifol, cysylltwch â ni."
Gallwch ein ffonio ar 101 neu anfon neges uniongyrchol atom ar Facebook neu X gydag unrhyw fanylion y credwch a allai helpu.
Fel arall, ffoniwch Crimestoppers yn ddienw ar 0800 555 111.