Cyhoeddi hysbysiad adran 60 ar ôl ymosodiad yng Nghasnewydd

Diweddariad 

i Mae'r hysbysiad adran 60 yng Nghasnewydd yn dilyn adroddiad o ymosodiad yn Nash Road bellach wedi'i godi.

Hoffem ddiolch i drigolion a'r gymuned ehangach am eu cydweithrediad.

Bydd swyddogion yn aros yn yr ardal wrth iddynt gynnal ymholiadau i'r ymosodiad honedig. 

Mae ail berson, bachgen 17 oed o Gasnewydd, hefyd wedi cael ei arestio mewn cysylltiad â’r digwyddiad ac mae'n dal i fod yn nalfa'r heddlu.

-

Cawsom adroddiad am ymosodiad ger Nash Road, Casnewydd, tua 1.30pm ddydd Iau 7 Tachwedd.

Aeth swyddogion yno ac arestio bachgen 16 oed o ardal Casnewydd ar amheuaeth o gyflawni ymosodiad adran 18 – clwyfo bwriadol.

Cafodd dyn 18 oed ei gludo i'r ysbyty am driniaeth ac ni chredir bod ei anafiadau'n peryglu ei fywyd nac y byddant yn newid ei fywyd.

Yn dilyn adroddiadau am anhrefn yng Nghasnewydd nos Iau, cafodd hysbysiad adran 60 ei awdurdodi i roi pwerau ychwanegol i swyddogion stopio a chwilio unigolion.

Dyma'r ardaloedd a gwmpesir gan yr hysbysiad, fydd yn weithredol o 7pm ddydd Iau 7 Tachwedd tan 7pm ddydd Gwener 8 Tachwedd: Dolphin Street, Commercial Road, Duke Street, West Market Street, Albert Street, Bolt Street, Francis Drive a Francis Street.

Dywedodd y Prif Uwch-arolygydd Carl Williams:

"Mae'r hysbysiad Adran 60 hwn yn fesur rhagofalus i gadw ein cymunedau yng Nghasnewydd yn ddiogel, ond rwy'n deall y gallai achosi pryder i drigolion hefyd.

"Efallai y gwelwch fwy o swyddogion yng Nghasnewydd tra bod yr hysbysiad hwn ar waith, felly os oes gennych unrhyw bryderon yna dewch atom i drafod.

"Ond rwyf am atgoffa pobl hefyd y byddwn yn cymryd camau cadarn yn erbyn pobl sy'n achosi aflonyddwch ac yn ymddwyn mewn ffordd gwbl amhriodol."

Gofynnir i unrhyw un sydd â gwybodaeth am yr ymosodiad honedig gysylltu â ni drwy ein gwefan, ffonio 101 neu anfon neges uniongyrchol atom ar y cyfryngau cymdeithasol, gan ddyfynnu'r cyfeirnod log 2400371556.

Fel arall, gallwch gysylltu â Crimestoppers yn ddienw gyda manylion ar 0800 555 111.