Deliwr cocên a arestiwyd yn Rhymni wedi'i garcharu am fwy na dwy flynedd

Mae deliwr cyffuriau o'r Coed Duon wedi ei ddedfrydu i 28 mis o garchar ar ôl i swyddogion ddod o hyd iddo â chocên, clorian a ffôn syml at ddibenion gwerthu cyffuriau yn ei feddiant.

Ymddangosodd Keiran Bass, 28 oed, o'r Coed Duon, yn Llys y Goron Casnewydd ddydd Iau 27 Chwefror, lle wynebodd gyhuddiadau o gyflenwi cyffuriau.

Ar 26 Tachwedd 2023, derbyniodd swyddogion Rhymni adroddiad bod dyn yn anymatebol mewn car a oedd wedi ei barcio ar Rowan Place, Rhymni.

Wrth i’r heddlu ymateb i'r alwad, gadawodd Bass y cerbyd cyn i swyddogion ei chwilio a chanfod y glorian.

Wedi chwilio'r car ymhellach daethpwyd o hyd i fagiau bach yn cynnwys cocên, ac arian parod.

Cafodd Bass ei arestio ar amheuaeth o fod â chyffuriau dosbarth A yn ei feddiant gyda'r bwriad o’u cyflenwi cyn i swyddogion fynd i’w gyfeiriad yn y Coed Duon i gynnal rhagor o chwiliadau - lle daethon nhw o hyd i fwy o gyffuriau, offer cyffuriau a ffonau.

O ddadansoddi’r ffonau hyn canfuwyd tystiolaeth o gyflenwi cyffuriau.

Dywedodd y Rhingyll Tom Brookes:

"Mae swyddogion ledled Bwrdeistref Caerffili yn parhau yn ddi-baid i fynd ar drywydd troseddwyr sy'n niweidio ein cymunedau drwy gyflenwi cyffuriau.

"Mae'r canlyniadau hyn yn bosib oherwydd y rôl bwysig sydd gan drigolion wrth roi gwybod am eu pryderon ynghylch cyflenwi cyffuriau - sy'n helpu i greu ein darlun o gudd-wybodaeth ac yn rhoi cyfle i ni ddod â throseddwyr o flaen y llysoedd."

Dedfrydwyd Bass i 28 mis o garchar.

Os oes gennych unrhyw bryderon neu wybodaeth am gyflenwi cyffuriau anghyfreithlon neu ddelio yn eich cymuned, rhowch wybod i ni drwy'r wefan, ffonio 101 neu anfon neges uniongyrchol atom ar y cyfryngau cymdeithasol, er mwyn i ni allu gweithredu.

Fel arall, gallwch gysylltu â Crimestoppers, yn ddienw, ar 0800 555 111, gyda gwybodaeth neu ewch i'w gwefan.