Prif arolygydd yn condemnio anhrefn diweddar yn y Coed-duon

Swyddogion yn parhau i weithredu yn erbyn y rhai sy’n ymddwyn yn wrthgymdeithasol yn y dref.

Mae ymgyrch amlasiantaeth newydd ar waith yng nghanol tref y Coed-duon i fynd i’r afael â’r cynnydd diweddar mewn ymddygiad gwrthgymdeithasol.

Mae swyddogion wedi cynyddu patrolau, wedi rhoi gorchmynion gwasgaru ar waith lle y bo angen, ac wedi arestio sawl person ar amheuaeth o droseddau yn erbyn y drefn gyhoeddus.

Dywed y Prif Arolygydd, Stevie Warden, fod yr ymddygiad diweddar yng nghanol y dref wedi bod yn “ddifeddwl” ac yn “annerbyniol” ac mae wedi ailadrodd ymrwymiad y gwasanaeth i fynd i’r afael â phob math o ymddygiad afreolus.

“Mae ein swyddogion yn parhau i weithio gyda’n partneriaeth diogelwch cymunedol i wneud popeth o fewn ein gallu i fynd i’r afael ag ymddygiad gwrthgymdeithasol yn y dref,” meddai.

“Mae’r orsaf bysiau, er enghraifft, yn un o’r ardaloedd lle rydym yn gwybod bod ymddygiad gwrthgymdeithasol yn digwydd ac mae hynny’n cael ei ystyried yn ein patrolau dyddiol a’n cynlluniau Ymgyrch Lumley wedi’u teilwra.

“Rydym yn ymwybodol o’r adroddiadau diweddar o anhrefn dros yr ychydig wythnosau diwethaf a phryderon cynghorwyr, ac rydym yn parhau i weithio gydag asiantaethau partner i fynd i’r afael â hyn.

“Yn ystod y pythefnos diwethaf, rydym wedi rhoi nifer o orchmynion gwasgaru, wedi arestio a chyhuddo merch 17 oed mewn perthynas â thorri hysbysiad gwarchod y gymuned, a byddwn yn parhau i gynnal patrolau rheolaidd yn yr ardal a chymryd camau priodol yn erbyn ymddygiad gwrthgymdeithasol.

“Yr hyn sy’n gadarnhaol yw ein bod wedi gweld llai o achosion o ymddygiad gwrthgymdeithasol yn y Coed-duon yn ystod y diwrnodau diwethaf, ond bydd ein gwaith yn parhau.

“Mae mynd i’r afael â’r mater yn mynd y tu hwnt i blismona. Byddem yn gofyn i rieni, gwarcheidwaid a gofalwyr ystyried – ydych chi’n gwybod lle mae eich plant yn cymdeithasu, ac a ydych chi’n gwybod a ydyn nhw’n gysylltiedig â’r hyn sy’n cael ei riportio i ni?

“Ac rydym yn eu hannog i gael sgyrsiau er mwyn helpu’r bobl ifanc hyn i ddeall bod y gweithredoedd hyn nid yn unig yn cael effaith negyddol ar y rhai o’u hamgylch, ond gallai unrhyw droseddau a gyflawnir ganddynt gael effaith negyddol arnynt yn y dyfodol – gallai eu rhwystro rhag cael eu swydd ddelfrydol, gwneud cais am fenthyciad ar gyfer car, neu fanteisio ar y cyfle i deithio.”