Apêl am dystion yn dilyn gwrthdrawiad yn Rowan Way

NEWYDDION DIWEDDARAF 17/01/25

Mae dyn 40 oed o Gasnewydd wedi cael ei arestio ar amheuaeth o nifer o droseddau gan gynnwys achosi anaf difrifol drwy yrru peryglus a pheidio â stopio yn dilyn gwrthdrawiad traffig ffyrdd. Mae yn y ddalfa ar hyn o bryd.

-

Mae swyddogion sy’n ymchwilio i adroddiad am wrthdrawiad traffig ffyrdd yn Rowan Way, Casnewydd tua 6.35am dydd Llun 13 Ionawr yn apelio am dystion.

Aeth swyddogion i’r safle ynghyd â phersonél o Wasanaeth Ambiwlans Cymru, Ambiwlans Awyr Cymru a Gwasanaeth Tân ac Achub De Cymru.

Roedd y gwrthdrawiad rhwng Volkswagen Passat arian a cherddwr. Aethpwyd â’r cerddwr, menyw, i’r ysbyty lle mae hi mewn cyflwr sefydlog ar hyn o bryd.

Yn ôl pob sôn gadawodd y bobl yn y car y safle cyn i’r heddlu gyrraedd.

Mae ymholiadau’n parhau a gofynnir i unrhyw un ag unrhyw wybodaeth, gan gynnwys delweddau TCCC, cloch drws, neu gamera car, gysylltu â ni.

Gallwch gysylltu â ni ar-lein, drwy ffonio 101, neu drwy anfon neges atom ni ar y cyfryngau cymdeithasol gan grybwyll rhif cofnod 2500012080.