Ffatri ganabis a gafodd ei datgymalu yn helpu pwll Casnewydd i flodeuo

Rhoddodd swyddogion wrtaith a atafaelwyd o ffatri ganabis i denantiaid Pwll Llyswyry gan arwain at ffrwydrad bendigedig o liw.

Cafodd gwrtaith a atafaelwyd o ffatri ganabis yng Nghasnewydd ei ddefnyddio i greu ffrwydrad o liw mewn rhan hardd o’r ddinas.

Daeth swyddogion o hyd i’r gwrtaith wrth ddatgymalu cnwd canabis mewn ffatri wag y llynedd, a arweiniodd at ddau arést.

Rhoddodd Heddlu Gwent y gwrtaith i Bwll Llyswyry ac, yn ystod misoedd y gaeaf, defnyddiodd deiliad y brydles, Ben Edmunds, ef mewn gwelyau uchel ac ymylon o gwmpas y safle yn Aberthaw Road.

Aeth Swyddog Cefnogi Cymuned yr Heddlu Joanne Spiteri, o’r tîm plismona cymdogaeth yn Alway, i ymweld â’r bysgodfa i weld y melyn Mair, y Betsan brysur a’r blodau gwyllt yn tyfu’n dda.

Meddai Rhingyll Chris Hopkin: "Mae Swyddog Cefnogi Cymuned yr Heddlu Spiteri a’i chydweithwyr yn gweithio’n agos gyda Ben i helpu i gadw’r ardal o gwmpas Pwll Llyswyry’n ddiogel rhag ymddygiad gwrthgymdeithasol a throseddau cysylltiedig.

"Yn ôl ym mis Tachwedd, datgymalodd ein swyddogion ffatri ganabis mewn warws wag yn Kelvedon Street ac roedd yn bleser gallu rhoi’r gwrtaith i Bwll Llysywry i’w helpu nhw gyda’u harddangosfeydd blodau.

“Trwy ail-ddefnyddio’r gwrtaith, rydyn ni wedi helpu i ddod â mwy o liw i’r safle ac wedi defnyddio eitemau sy’n aml yn cael eu defnyddio at ddibenion troseddol er budd ein cymunedau.

"Mae Pwll Llyswyry yn drysor yn y gymuned leol y mae llawer o breswylwyr yn mwynhau ymweld ag ef, yn arbennig pan fydd yr haul yn tywynnu yn ystod misoedd yr haf.

“Rwyf yn gobeithio bod aelodau’r gymuned yn mwynhau gweld y blodau yma hefyd.”

Mae Ben Edmunds a Leanne Bill yn rhentu Pwll Llyswyry ar brydles gan Gyngor Dinas Casnewydd trwy eu cwmni, Angling Watch UK.

Dywedodd: “Rydyn ni’n falch iawn i fod wrth galon ein cymuned, ac rydyn ni wrth ein boddau i fod wedi gallu elwa’n gadarnhaol ar ôl i’r ffatri ganabis gael ei datgymalu'r llynedd.

“Mae ein harddangosfeydd blodau’n edrych yn wych – mae’r melyn Mair, y Betsan brysur a’r blodau gwyllt gan Cadw Cymru’n Daclus yn blodeuo’n hyfryd yn y gwelyau uchel.

"Mae gennym ni berthynas weithio ardderchog gyda Heddlu Gwent a’r tîm plismona cymdogaeth yn Alway a hoffwn ddiolch i’r gymuned leol am ei chefnogaeth barhaus."

Os oes gennych chi unrhyw wybodaeth am gyflenwi cyffuriau yn eich ardal chi, ni waeth pa mor ddibwys rydych chi’n credu ydyw, cysylltwch â Heddlu Gwent.

Mae effeithiau cynhyrchu, gwerthu a chyflenwi cyffuriau anghyfreithlon yn gallu cael effaith fawr ar ein cymunedau, a byddwn ni’n parhau i wneud popeth o fewn ein gallu i weithredu ac i amddiffyn pobl agored i niwed.

Gall unrhyw un â gwybodaeth berthnasol gysylltu â ni ar ein gwefan, ein ffonio ni ar 101, neu anfon neges uniongyrchol atom ni ar ein tudalennau Facebook neu X, er mwyn i ni allu gweithredu.

Gallwch ffonio Crimestoppers hefyd, yn ddienw, ar 0800 555 111 gyda gwybodaeth, neu ewch i’w gwefan.

Ben Edmunds, Angling Watch UK, o Bwll Llyswyry, gyda Swyddog Cefnogi Cymuned yr Heddlu, Joanne Spiteri