Gêm, set a match! Dros 90 o blant yn cymryd rhan mewn menter tennis lwyddiannus dros yr haf
Cynnwys y prif erthygl
Diolchodd yr Arolygydd Lysha Thompson a'i thîm plismona cymdogaeth i drigolion Rhymni am yr ymateb hynod gadarnhaol i fenter newydd sydd wedi gweld dros 90 o blant yn codi raced a phêl dros yr haf.
Lansiwyd y rhaglen 'Yn y cwrt iawn' gan y tîm gyda'r nod o ddod â phobl ifanc Rhymni at ei gilydd i hyrwyddo cymunedau cadarnhaol, iechyd a ffitrwydd.
Mae'n rhan o Parchu Rhymni, menter Clirio, Cynnal ac Adeiladu* y tîm plismona cymdogaeth, sy'n ceisio cael gwared ar gangiau troseddol o’r ardal, cynyddu balchder yn yr ardal ac addysgu pobl ifanc am ganlyniadau troseddu ac ymddygiad afreolus.
Dywedodd yr Arolygydd Thompson:
"Yn ystod yr wythnos gyntaf yn unig, gwelsom dros 30 o blant, rhwng tair a deuddeg oed, yn dod draw i'r cyrtiau yn Rhymni i gwrdd â swyddogion.
"Rydyn ni i gyd wrth ein bodd bod cymaint o bobl ifanc wedi gallu mwynhau eu hunain yn y fenter dros 14 wythnos, ond hefyd wedi dysgu ychydig am eu cymuned a rhoi yn ôl i'r pentref.
"Rhoddodd gyfle gwych i ni gwrdd â'r plant a'u gwarcheidwaid, ac, yn ogystal â'r holl dennis a chwaraewyd, dechrau sgwrs ynghylch sut y gall ein hymddygiad a'n gweithredoedd effeithio ar ble rydyn ni'n byw - yn gadarnhaol ac yn negyddol.
"Diolch i bawb a fu’n rhan o’r fenter dros yr haf. Rydyn ni nawr yn gweithio'n galed i sicrhau cyllid i'w gwneud yn ddigwyddiad blynyddol yn Rhymni - rhywbeth yr oedd yr holl gyfranogwyr yn ei fynnu erbyn y sesiwn olaf!"
Mae'r tîm hefyd wedi lansio cynllun Hyrox cymunedol yn Ystrad Mynach, ac maen nhw'n paratoi ar gyfer diwrnod gwasanaethau brys i'r teulu yng Nghlwb Ieuenctid Rhymni ar 4 Hydref.
*Mae Parchu Rhymni, menter Clirio, Cynnal, Adeiladu Heddlu Gwent, yn cynnwys tri cham.
Mae’r cam Clirio wedi gweld ein swyddogion yn gweithio’n galed i dargedu grwpiau troseddol gan darfu arnyn nhw a’u rhwystro nhw rhag gweithredu; wedyn mae gwaith gorfodi ac ymgysylltu’n parhau er mwyn Cynnal yr ardal ac atal grwpiau troseddol eraill rhag llenwi’r bwlch.
Mae’r cam ‘Adeiladu’ yn rhoi pwyslais ar feithrin balchder yn yr ardal, a dysgu plant a phobl ifanc am ganlyniadau trosedd ac ymddygiad gwrthgymdeithasol.
I gael rhagor o wybodaeth am waith y tîm plismona cymdogaeth yn yr ardal, ewch i https://www.gwent.police.uk/cy-GB/news/gwent/newyddion/news/2025/june/gwent-officers-serve-up-summer-of-community-fun/.