Cydnabyddiaeth i’n harwyr pedair coes cyn Diwrnod Rhyngwladol y Cŵn

Mae Heddlu Gwent wedi cydnabod ymroddiad, dewrder a sgiliau atal trosedd eu cŵn heddlu a’u trinwyr mewn digwyddiad cydnabyddiaeth arbennig.

Cyn Diwrnod Rhyngwladol y Cŵn ddydd Mercher 26 Awst, ymunodd Prif Gwnstabl Mark Hobrough gyda swyddogion, staff ac aelodau Fforwm Iechyd Dynion yr heddlu y tu allan i Dŷ Caerllion, Mamhilad, ar 20 Awst i ddiolch i’r Adran Cŵn am ei waith rhagorol yn cadw cymunedau ledled Gwent yn ddiogel.

Mae cŵn y gwasanaeth heddlu yn chwarae rhan hollbwysig mewn plismona rheng flaen, yn helpu swyddogion i olrhain drwgweithredwyr, dod o hyd i bobl coll, a chanfod cyffuriau, arian, arfau tanio a ffrwydron. Mae eu sgiliau  arbenigol yn eu gwneud yn gaffaeliad gwerthfawr wrth atal a chanfod troseddu ledled ardal yr heddlu.

Yn rhan o’r digwyddiad, cyflwynodd y Fforwm Iechyd Dynion, sy’n rhoi cymorth lles i staff, “flychau gwên” i’r trinwyr a’u cŵn i ddangos eu gwerthfawrogiad a’u cydnabyddiaeth am y gwaith hollbwysig maen nhw’n ei wneud bob dydd. Pwrpas Blychau Gwên yw hyrwyddo lles, codi calon a dangos gwerthfawrogiad i’r rhai sy’n eu derbyn.

Meddai Prif Gwnstabl Mark Hobrough:

" Mae ein cŵn heddlu a’u trinwyr yn dîm eithriadol. Maen nhw’n gweithio gyda’i gilydd ddydd a nos i amddiffyn preswylwyr, cefnogi ein timau a helpu i ddwyn troseddwyr o flaen eu gwell.

"Y tu ôl i bob gweithred lwyddiannus mae hyfforddiant helaeth, ymroddiad ac ymddiriedaeth rhwng y triniwr a’r ci. Mae eu gwaith yn aml yn digwydd y tu ôl i’r llenni ond mae’r effaith maen nhw’n ei chael ar gadw pobl yn ddiogel yn enfawr.

"Roedd yn fraint ymuno â chydweithwyr i gydnabod eu cyflawniadau ac i ddiolch iddyn nhw am yr holl waith maen nhw’n ei wneud i Heddlu Gwent a’r bobl rydym yn eu gwasanaethu."

Mae cŵn yr heddlu’n cael eu hyfforddi’n arbenigol ar gyfer amryw o rolau plismona ac mae galw cyson am eu sgiliau a’u cymorth mewn digwyddiadau ledled Gwent a thu hwnt. Pa un ai ydynt yn olrhain troseddwyr, chwilio ardaloedd mawr o dir am bobl agored i niwed neu’n helpu i ddod o hyd i dystiolaeth hollbwysig, maen nhw’n parhau i fod yn un o’r dulliau ymladd trosedd mwyaf effeithiol mewn plismona.

Ychwanegodd Rhingyll Heddlu Geraint Hopkins:

“Mae rhan fawr o’n gwaith yn y Fforwm Iechyd Dynion yn ymwneud ag chydnabod pobl, cefnogi lles a gwneud yn siŵr fod cydweithwyr yn gwybod bod eu gwaith yn cael ei werthfawrogi.

“Fel Rheolwr yr Uned Hyfforddi Cŵn, rwy’n gweld yn uniongyrchol y gofal, ymroddiad a’r sgiliau sy’n rhan annatod o’r rôl yma. Mae trinwyr cŵn heddlu yn rhoi cymaint o’u hamser eu hunain i’r gwaith ac yn aml mae’n rhaid iddyn nhw roi mwy o bwyslais ar anghenion eu cŵn na’u hanghenion nhw eu hunain. Mae’r berthynas rhwng y triniwr a’r ci, a’r safonau maen nhw’n eu cynnal gyda’i gilydd yn dod o ganlyniad i’r ymroddiad a’r  ymddiriedaeth yma, a llawer iawn o waith caled.”

Mae Diwrnod Rhyngwladol y Cŵn, sydd ar 26 Awst bob blwyddyn, yn cydnabod y rhan mae cŵn yn ei chwarae mewn cymdeithas ac yn codi ymwybyddiaeth o berchnogaeth gyfrifol, lles a mabwysiadu. I Heddlu Gwent, mae’n gyfle hefyd i gydnabod ymroddiad ei swyddogion pedair coes a’u trinwyr sy’n gweithio ochr yn ochr â nhw bob dydd.