Dau o bobl wedi’u harestio yn dilyn adroddiadau am fyrgleriaethau yng nghanol dinas Casnewydd

Mae swyddogion sy’n ymchwilio i gyfres o fyrgleriaethau masnachol yn ardal Casnewydd wedi arestio dau o bobl.

Arestiwyd dyn 42 oed ar amheuaeth o fyrgleriaeth ddydd Mawrth 25 Awst.

Arestiwyd dyn 33 oed ar amheuaeth o dri chyhuddiad o fyrgleriaeth a phedwar cyhuddiad o ddwyn o siop ddydd Mercher 26 Awst.

Mae’r ddau ddyn, o Gasnewydd, yn nalfa’r heddlu ar hyn o bryd wrth i ni barhau i ymchwilio.

Meddai Uwch-arolygydd Esyr Jones, Plismona Cymdogaeth Gwent:

“Trwy Ymgyrch Krypton, ein dull partneriaeth o ymdrin ag ymddygiad gwrthgymdeithasol a throseddu yng Nghasnewydd, rydyn ni wedi dangos y byddwn yn cymryd camau penderfynol yn erbyn y rheini rydyn ni’n amau sy’n troseddu, ac rydyn ni wedi arestio mwy na 160 o bobl hyd yn hyn yr haf yma. 

“Rydyn ni wedi dal, arestio a chyhuddo nifer o bobl dan amheuaeth o fyrgleriaeth, sy’n aros i gael eu dedfrydu.

"Bydd y dull rhagweithiol hwn yn parhau a byddwn yn gweithio’n ddiflino i ymlid y rhai sy’n achosi niwed yng nghanol dinas Casnewydd a thu hwnt."