Dau o bobl eraill wedi’u cyhuddo mewn ymchwiliad i honiadau o gam-drin plant mewn cyn ganolfan i blant

Mae ditectifs sy’n ymchwilio i adroddiadau am gam-drin plant mewn cyn ganolfan i blant yn Sir Fynwy wedi cyhuddo dau o bobl eraill.  

Mae Gwasanaeth Erlyn y Goron wedi awdurdodi cyhuddo dau o bobl o’r troseddau o ymosod / cam-drin / esgeuluso / gadael plentyn / person ifanc i achosi dioddefaint neu anaf diangen

Cyhuddwyd menyw 59 oed o Sir Fynwy, sy’n weithiwr cymdeithasol wedi’i chyflogi gan Gyngor Bwrdeistref Sirol Caerffili, o bedwar cyfrif.

Cyhuddwyd dyn 55 oed o Gaerffili o ddau gyfrif. 

Bydd y ddau ohonynt yn ymddangos gerbron Llys Ynadon Casnewydd yfory (12 Chwefror).

Mae Ymgyrch Spinney wedi bod yn ymchwilio i adroddiadau a wnaed gan nifer o ddynion a menywod am gam-drin rhywiol a chorfforol yn eu herbyn pan oeddent yn blant, yn bennaf yng nghyn Ganolfan Asesu Coed Glas yn Y Fenni, rhwng y 1970au a’r 1990au.

Cyn awdurdod lleol Gwent oedd yn gyfrifol am y ganolfan ar y pryd ac mae wedi cau ers 1995.

Cyhuddwyd dau ddyn, 66 a 69 oed, ym mis Mehefin 2025 o 45 trosedd rhyngddynt.

Roedd y cyhuddiadau yn Ymgyrch Spinney’n ymwneud â 18 o ddioddefwyr.

Meddai Ditectif Brif Uwch-arolygydd Andrew Tuck o Heddlu Gwent:  

“Hyd yn hyn mae Ymgyrch Spinney wedi arwain at dros 50 o gyhuddiadau troseddol yn erbyn pedwar o bobl a oedd yn gysylltiedig â’r cyn gartref plant yn Y Fenni.

“Rydyn ni’n canolbwyntio ar sicrhau cyfiawnder i’r dioddefwyr yn yr ymchwiliad hwn ac, ynghyd ag asiantaethau arbenigol, rydyn ni’n rhoi cymorth iddyn nhw.

“Rydyn ni’n dal i weithio’n agos gyda Gwasanaeth Erlyn y Goron ac awdurdodau lleol yn rhan o’r ymchwiliad maith yma.

“Gofynnwn i bobl barchu’r broses gyfreithiol ac osgoi dyfalu ar-lein am yr achos yma, er mwyn sicrhau uniondeb yr ymchwiliad a’r achos llys.  

“Rydyn ni’n cymryd pob adroddiad am gam-drin plant o ddifrif a gofynnwn yn daer ar unrhyw un sydd wedi dioddef camdriniaeth, neu sy’n pryderu am rywun a all fod yn dioddef, i siarad â’r heddlu. Byddwn yn gwrando arnoch chi ac yn ymchwilio i bob trosedd, a byddwn yn sicrhau eich bod yn cael unrhyw gymorth neu gefnogaeth sydd ei hangen arnoch chi.”  

I riportio cam-drin plant, cysylltwch â ni ar-lein neu drwy ffonio 101. Os ydych chi neu rywun rydych yn ei adnabod mewn perygl ar unwaith neu’n agored i niwed, ffoniwch 999. 

I gael rhagor o wybodaeth am yr asiantaethau cymorth sydd ar gael, ewch i’n gwefan Advice about child abuse | Gwent Police