Gyrrwr peryglus yn taflu beic trydan Sur-Ron oddi ar bont wrth i swyddogion agosáu ato

Cafodd gyrrwr wedi’i wahardd ei ffilmio yn reidio beic trydan Sur-Ron yn beryglus ac yna’n taflu’r peiriant oddi ar Bont Tref Casnewydd i mewn i’r Wysg.

Cafodd Owen Pendree ei ffilmio gan griw o Wasanaeth Awyr Cenedlaethol yr Heddlu (NPAS), a oedd yn gweithio mewn partneriaeth gyda Heddlu Gwent, ar Heol Corporation, Casnewydd, ddydd Mawrth 30 Mehefin.

Gyda chymorth NPAS, defnyddiodd ein swyddogion gadwyn bigog ac, ar ôl cael ei ymlid am ychydig, cafodd y diffynnydd ei stopio a’i arestio ar y bont ger Clarence Place.

Plediodd Pendree, 32, o Gasnewydd yn euog i yrru peryglus, gyrru tra oedd wedi’i wahardd a defnyddio cerbyd modur heb yswiriant yn Llys Ynadon Casnewydd ddydd Mercher 1 Gorffennaf.

Dedfrydwyd Pendree i 12 mis o garchar.

Cafodd ei wahardd rhag gyrru am dair blynedd a hanner hefyd a bydd angen iddo lwyddo mewn prawf estynedig cyn y caiff yrru eto.

Meddai Cwnstabl Heddlu Nathan Ford, y swyddog yn yr achos:

“Diolch i waith tîm rhwng ein swyddogion a NPAS roedd ein hadnoddau yn y lle iawn i stopio Pendree yn gyflym ar ôl i ni gydweithio i ymdrin â’i yrru peryglus

“Roedd y dystiolaaeth fideo a gasglwyd yn dangos yn glir bod Pendree yn gwneud ‘wheelies’ ac yn gyrru’n beryglus; doedd ganddo fawr o ddewis ond pledio’n euog i’r cyhuddiadau roedd yn eu hwynebu yn y llys.

“Doedd gan Pendree ddim trwydded ddilys nac yswiriant priodol.

“Rydyn ni’n croesawu’r ddedfryd hon; mae’n dangos y bydd gyrwyr peryglus yn cael eu dwyn gerbron y llys.

“Bydd ein swyddogion yn parhau i gymryd camau priodol a defnyddio amryw o dactegau i atal pobl fel Pendree sy’n diystyru’r gyfraith ac yn gyrru’r peiriannau hyn mewn ffordd sy’n eu rhoi nhw a defnyddwyr eraill y ffyrdd mewn perygl o niwed.”

Os oes gennych chi bryderon am feiciau trydan yn cael eu defnyddio’n anghyfreithlon yn eich ardal, riportiwch y mater wrthym ni ar 101, cysylltwch â ni ar ein gwefan neu anfonwch neges uniongyrchol at ein tudalennau cyfryngau cymdeithasol Facebook neu X.

Ffoniwch 999 bob tro mewn argyfwng.

Owen Pendree