Deliwr yn gollwng bagiau o gyffuriau yn y stryd wrth gael ei ymlid gan yr heddlu

Gollyngodd deliwr cyffuriau o Fargod gocên yn y stryd wrth geisio dianc oddi wrth swyddogion.

Pan aeth swyddogion ar batrôl i fyny at James Roe a dweud wrtho eu bod yn mynd i’w chwilio, rhegodd y dyn 42 oed arnynt a rhedodd i ffwrdd tuag at Heol y Gogledd.

Ymhen dim, roedd swyddogion buandroed o’r tîm Gweithredu yn y Gymuned wedi ei ddal, a hynny ar ôl iddo ollwng nifer o fagiau o gyffuriau o ddosbarth A ar draws y palmant.

Mae wedi cael ei ddedfrydu i tri blynedd a pedwar mis​ o garchar am droseddau cyflenwi cyffuriau.

Roedd tîm Gweithredu yn y Gymuned Gwent ar batrôl ym Margod noswaith y 27^ain o Ebrill pan welsant Toyota arian a oedd wedi cael ei gysylltu’n ddiweddar gyda chyflenwi cyffuriau.

Yn ddiweddarach gwelodd swyddogion James Roe yn dychwelyd i’r cerbyd a oedd wedi’i barcio ar Stryd Llancaeo. Dywedwyd wrtho ei fod yn cael ei ddal er mwyn cael ei chwilio o dan adran 23 o’r Ddeddf Camddefnyddio Cyffuriau.

Rhegodd y dihiryn arnynt a rhedodd i ffwrdd cyn baglu a gwasgaru bagiau’n cynnwys cocên ar hyd y llawr.

Meddai Cwnstabl yr Heddlu Guto Jenkins, swyddog yn yr achos:

"Ar ôl i swyddogion ei ymlid a’i ddal, arestiwyd Roe a chafodd ei gyhuddo o fwriad o gyflenwi cyffuriau o ddosbarth A, ymwneud â chyflenwi cocên, a bod ag eiddo troseddol yn ei feddiant.

"Roedd y ffordd yr aeth i banig a cheisio dianc yn dangos nad oedd yn malio dim nac yn edifar am ei droseddau, dim ond dianc oedd yn bwysig iddo.

"Mae ein patrolau rhagweithiol, ein hymchwiliadau ac ymgyrchoedd yn parhau i fynd i’r afael â chyflenwi cyffuriau anghyfreithiol a niweidiol yn ein cymunedau a diogelu pobl agored i niwed.

"Dim ond diolch i’r rhan hollbwysig mae ein cymunedau’n ei chwarae yn rhannu eu pryderon gyda ni mae ymchwiliadau fel yr un yma’n bosibl.

Os oes gennych chi bryderon am gyffuriau anghyfreithlon yn eich ardal, gallwch roi gwybod i ni ar ein gwefan, drwy ffonio 101 neu drwy anfon neges uniongyrchol at ein tudalennau cyfryngau cymdeithasol Facebook neu X, er mwyn i ni weithredu.

Fel arall, gallwch gysylltu â Crimestoppers, yn ddienw, ar 0800 555 111, gyda gwybodaeth neu ewch i’w gwefan.