Bron i 100 o bobl yn cael eu harestio yn ystod Ymgyrch Krypton yng Nghasnewydd

Mae Heddlu Gwent wedi arestio bron i 100 o bobl yn ystod Ymgyrch Krypton, dull partneriaeth o fynd i’r afael ag ymddygiad gwrthgymdeithasol a throseddu yng Nghasnewydd.

Cafodd Ymgyrch Krypton ei lansio ddechrau mis Gorffennaf ac mae’n cynnwys Heddlu Gwent a phartneriaid, gan gynnwys Cyngor Dinas Casnewydd a Hedyn, yn gweithio gyda’i gilydd i wella diogelwch yng nghanol y ddinas.

 Rydym wedi cynnal mwy na 30 o chwiliadau stopio a chwilio, wedi gweithredu 13 o warantau ac wedi atafaelu mwy na dwsin o gerbydau yn ystod yr ymgyrch hyd yn hyn.

 Rydym wedi cyhoeddi gorchymyn gwasgaru yng nghanol dinas Casnewydd yr wythnos hon ar gyfer ardaloedd gan gynnwys High Street, Cambrian Road a Commercial Street, er mwyn helpu i ddiogelu siopwyr a busnesau.

Mae’r gorchymyn, sydd mewn grym tan 3pm ddydd Sul 2 Awst, yn rhoi pwerau ychwanegol i swyddogion gyfarwyddo grwpiau i adael ardal os ydynt yn ymwneud ag ymddygiad gwrthgymdeithasol neu anhrefn, os yw aelodau o’r cyhoedd yn cael eu haflonyddu, eu dychryn neu’n gofidio, neu os yw swyddogion yn credu y gallai eu hymddygiad arwain at ymddygiad gwrthgymdeithasol.

Y penwythnos diwethaf, cynhaliwyd ymweliadau ar y cyd â naw safle trwyddedig yng nghanol dinas Casnewydd.

Yn ystod ein hymweliadau, gwnaethom asesu cydymffurfiaeth staff drws economi nos canol y ddinas a monitro’r ffordd y caiff ciwiau eu rheoli.

Gwelsom yn uniongyrchol hefyd sut roedd staff drws safleoedd trwyddedig yn chwilio pobl ar noson allan yn ddiogel ac yn broffesiynol.

Gwnaeth yr ymweliadau hyn helpu i gryfhau ein perthynas â thrwyddedeion a staff diogelwch drws yng nghanol y ddinas.

Dywedodd yr Uwch-arolygydd Esyr Jones, Plismona yn y Gymdogaeth Gwent:

“Mae ein gwaith partneriaeth parhaus ar gyfer Ymgyrch Krypton wedi arwain at arestio 92 o bobl am amrywiaeth o droseddau, o gyflenwi cyffuriau a byrgleriaeth i ymosod a thorri mechnïaeth, i ymddygiad afreolus.

“Rydyn ni hefyd wedi gweithio gyda’r Gwasanaeth Troseddau Ieuenctid yr wythnos hon i gymryd camau priodol yn erbyn person ifanc yn dilyn adroddiad am ymosodiad ar High Street.

“Rydyn ni wedi ymrwymo i weithio gyda’n partneriaid, gan gynnwys Cyngor Dinas Casnewydd, i wella diogelwch yng nghanol y ddinas a phan fyddwn ni’n nodi troseddau, hyd yn oed yn ôl-weithredol, byddwn ni’n cymryd camau priodol.

“Rydyn ni’n gwrando ar eich pryderon – a byddwch chi’n parhau i weld mwy o batrolau yng nghanol dinas Casnewydd yn yr wythnosau nesaf.”

Mae eich adroddiadau yn parhau i fod yn allweddol i’n galluogi i nodi a deall lefel gywir y galw am blismona yng nghanol y ddinas – felly parhewch i riportio eich pryderon i ni.

Rydyn ni’n annog pobl i gofrestru am ddim ar gyfer Materion Cymdogaeth – ein system negeseuon ac ymgysylltu cymunedol.

Os gwelwch chi unrhyw beth amheus pan fyddwch chi allan yng Nghasnewydd, ffoniwch ni ar 101, anfonwch neges atom ar ein sianeli cyfryngau cymdeithasol Facebook neu X, neu rhowch wybod amdano ar-lein.

Gallwch chi hefyd ffonio Crimestoppers, yn ddienw, ar 0800 555 111 gyda gwybodaeth, neu gysylltu ar-lein.

Os gwelwch chi drosedd yn cael ei chyflawni, neu os yw’n argyfwng ac mae angen cymorth yr heddlu arnoch ar unwaith, ffoniwch 999 bob amser.