Dau o bobl wedi’u cyhuddo gan swyddogion yn ymchwilio i gyflenwi cyffuriau dosbarth A yng Nghasnewydd

Arestiwyd Thomas Coffey o Stow Hill, Casnewydd,  a Victoria Seymour o Howe Circle, Casnewydd gan swyddogion o’r tîm Troseddau Cyfundrefnol Difrifol ddydd Iau 30 Gorffennaf.

Cyhuddwyd Coffey, 52, o nifer o droseddau gan gynnwys ymwneud â chyflenwi cyffur rheoledig o ddosbarth A - crac cocên, bod â chyffur o ddosbarth A - crac cocên a chocên - yn ei feddiant gyda’r bwriad o gyflenwi, bod ag arf troseddol yn ei feddiant mewn man preifat, bod ag eiddo troseddol yn ei feddiant a bod â chyffur o ddosbarth B - canabis - yn ei feddiant.

Cyhuddwyd Seymour, 45, o ymwneud â chyflenwi cyffur o ddosbarth A - crac cocên, bod â chyffur o ddosbarth A - crac cocên a chocên - yn ei meddiant gyda’r bwriad o gyflenwi, a bod ag eiddo troseddol yn ei meddiant.

Remandiwyd y ddau ohonynt i’r ddalfa yn dilyn eu hymddangosiad yn Llys Ynadon Casnewydd ddydd Gwener 31 Gorffennaf.

Arestiwyd bachgen 17 oed hefyd ar amheuaeth o ymwneud â chyflenwi cyffur rheoledig o ddosbarth A - crac cocên. Cafodd ei ryddhau ar fechnïaeth yr heddlu wrth i ni barhau i ymchwilio.