Ymchwiliad i lofruddiaeth wedi’i lansio yng Nghil-y-coed

Mae Heddlu Gwent wedi lansio ymchwiliad i lofruddiaeth yn dilyn adroddiad bod menyw wedi cael ei chanfod yn ddiymateb mewn cyfeiriad yng Nghil-y-coed.

Aeth swyddogion i gyfeiriad yn Green Lane, Cil-y-coed tua 3am ddydd Iau 4 Mehefin ynghyd â pharafeddygon o Wasanaeth Ambiwlans Cymru.

Cyhoeddwyd bod menyw 52 oed o Gil-y-coed wedi marw yn lleoliad; mae ei theulu wedi cael gwybod ac maen nhw’n cael cymorth gan swyddogion arbenigol.

Mae dyn 50 oed o Gil-y-coed wedi cael ei arestio ar amheuaeth o lofruddiaeth ac mae yn y ddalfa ar hyn o bryd.

Dywedodd Ditectif Brif Arolygydd Matthew Clarke, yr uwch swyddog ymchwilio:

"Rydym eisiau sicrhau cymunedau Cil-y-coed ein bod yn gwneud popeth o fewn ein gallu i ddarganfod amgylchiadau marwolaeth y dioddefwr.

"Rydym yn deall bod adroddiadau o’r natur hwn yn gallu achosi pryder, ond rydym wedi arestio dyn o’r ardal yr oedd y dioddefwr yn ei adnabod, ac nid ydym yn chwilio am unrhyw un arall mewn cysylltiad â’r digwyddiad yma.

"Efallai bydd preswylwyr yn gweld mwy o swyddogion yn yr ardal wrth i ni gynnal ymholiadau pellach. Gofynnwn i unrhyw un â gwybodaeth siarad ag un o’n swyddogion, neu gysylltu â ni yn y ffyrdd arferol."

Mae swyddogion yn apelio ar unrhyw un â gwybodaeth i ddod i siarad â ni, yn arbennig preswylwyr sy’n byw yn Green Lane a Cae Mawr Road a allai fod wedi clywed unrhyw beth anarferol yn ystod oriau mân dydd Iau 4 Mehefin.

Gallwch gysylltu â ni drwy ffonio 101, anfon neges uniongyrchol ar y cyfryngau cymdeithasol, neu drwy gyfrwng y ffurflen ar ein gwefan a chrybwyll rhif cofnod 2600174602.

Gallwch gysylltu â Crimestoppers hefyd, yn ddienw, ar 0800 555 111.